ہمارے نیوکلیئر اثاثے دفاع کیلیے ہیں، مودی کو خواب میں بھی پاک فوج نظر آتی ہے، خواجہ آصف

اسلام آباد (15 اگست 2025): وزیر دفاع خواجہ آصف کا کہنا ہے کہ بھارتی وزیر اعظم نریندر مودی کو اب خواب میں بھی پاکستان اور اس کی افواج نظر آتی ہیں۔

نجی نیوز چینل سے گفتگو کرتے ہوئے خواجہ آصف نے واضح کیا کہ پاکستان نیوکلیئر بلیک میلنگ کر رہا ہے اور نہ اس پر یقین رکھتا ہے ہمارے جوہری اثاثے ملکی دفاع کیلیے ہیں کسی کو بلیک میل نہیں کرتے، جوہری صلاحیت ہمارے دفاع کی ضمانت ہے۔

خواجہ آصف نے کہا کہ نریندر مودی کیلیے پاکستان سے جنگ ایک ڈراؤنا خواب بن چکا ہے وہ بنیادی طور پر اپنے ووٹرز کو مطمئن کر رہے ہیں، پاکستان نے بھارت سے اپنے دفاع میں جنگ لڑی اور جیتی۔

یہ بھی پڑھیں: امریکی صدر اور فیلڈ مارشل کی ملاقات موجودہ ہائبرڈ ماڈل کی کامیابی ہے، خواجہ آصف

وزیر دفاع نے کہا کہ نریندر مودی کیلیے دوسری جنگ بھارت کے اندر نظر آ رہی ہے جہاں ان کے خلاف آوازیں اٹھ رہی ہیں، بھارتی شہری خود کہہ رہے کہ مودی کا رویہ ایسا تھا کہ جنگ تک کی نوبت آگئی، بھارتی وزیر اعظم پر کانگریس سمیت چھوٹی ریاستوں میں بھی شہری تنقید کر رہے ہیں۔

پاکستان کی ایٹمی صلاحیتیں اپنے دفاع میں ہیں کسی کو اس سے خطرہ نہیں ہو سکتا

’مودی ایسے بیانات دے کر اپنے گھر میں اٹھنے والے طوفان کو روکنے کی کوشش کر رہا ہے۔ بھارتی وزیر اعظم جانے اور ان کے اپنے گھر کے سیاسی افراد جانیں پاکستان کا اس سے کوئی تعلق نہیں۔ پاکستان کی ایٹمی صلاحیتیں اپنے دفاع میں ہیں کسی کو اس سے خطرہ نہیں ہو سکتا۔‘

بھارت میں مودی کی ناکامی ان کی اپوزیشن کیلیے ایک موقع ہے

ان کا کہنا تھا کہ سال یا ڈیڑھ سال قبل بھارت کا سیاسی و معاشی طور پر کچھ مقام تھا لیکن مودی کے ہاتھوں بھارت اپنا مقام کھو بیٹھا ہے، بھارت میں مودی کی ناکامی ان کی اپوزیشن کیلیے ایک موقع ہے، اپوزیشن ان کی ناکامیوں سے فائدہ اٹھا رہے ہیں، بھارتی اپوزیشن کو یہ موقع ملا ہے کہ وہ ایک مرتبہ پھر اپنا مقام بنا سکیں۔

مودی کے چہرے پر دہشتگردی کا دھبہ لگ چکا ہے

خواجہ آصف نے مزید کہا کہ بھارتی وزیر اعظم کی قیادت نے بھارت کو اندرونی اور بین الاقوامی سطح پر نقصان پہنچایا، بھارت نے جس طرح دہشتگردی کی پشت پناہی کی بین الاقوامی سطح پر بھی اسے ناکامی ہوئی، کینیڈا اور پاکستان میں دہشتگردی کے واقعات مودی سرکار نے کروائے، اس کے چہرے پر دہشتگردی کا دھبہ لگ چکا ہے۔

بی ایل اے اور طالبان بھارت کی پراکسیز ہیں

وزیر دفاع نے کہا کہ پاکستان میں بی ایل اے اور طالبان بھارت کی پراکسیز ہیں پاکستان کے پاس بھارتی دہشتگردی کے ثبوت ہیں عالمی فورم پر جمع بھی کروائے، اگر اچھے ہمسایوں کی طرح رہا جائے تو برصغیر میں امن ممکن ہے، برصغیر کی عوام معاشی ترقی بھی کر سکتے ہیں۔