بالوں میں خشکی یا ڈینڈرف ایک ایسا مسئلہ ہے جو کسی بھی محفل میں سر کھجانے کے نتیجے میں ہمارے لیے پریشانی کے ساتھ ساتھ شرمندگی کا باعث بھی بنتا ہے۔
آپ کو یہ جان کر حیرت ہوگی کہ خشکی بنیادی طور پر فنگس کی وجہ سے ہوتی ہے، اور اسی وجہ سے بال گرنا بھی شروع ہوجاتے ہیں، تاہم یہ لاعلاج ہرگز نہیں تھوڑی سی توجہ دے کر ہم اس سے باآسانی چھٹکارا حاصل کرسکتے ہیں۔
ماہرین کے مطابق سر اور چہرے کی جلد کو ہمیشہ ٹھنڈے پانی سے دھونا چاہیے، ٹھنڈا پانی جلد کی متعدد بیماریوں کا قدرتی علاج ہے، موسم سرما میں گرم پانی سے نہانے کی وجہ سے بھی سر میں خشکی کی شکایت مزید بڑھ جاتی ہے اور بال گرنے کی شکایت میں اضافہ ہوجاتا ہے۔
ویسے تو خشکی کے علاج کے لیے کئی گھریلو ٹوٹکے اور طبی طریقے موجود ہیں، عام طور پر لوگ ہلکے اینٹی ڈینڈرف شیمپو اور کچھ قدرتی علاج جیسے ناریل کا تیل، لیموں کا رس اور سیب کا سرکہ استعمال کرتے ہیں اور اگر خشکی کی شکایت شدید ہوجائے تو ایسے میں طبیب کا مشورہ لینا زیادہ بہتر ہے۔
زیر نظر مضمون میں بالوں میں خشکی دور کرنے کیلیے پیاز کا تیل بنانے کا طریقہ بیان کیا گیا ہے جس کا استعمال خشکی سے چھٹکارا حاصل کرنے کا بہترین ذریعہ ہے۔
پیاز کا تیل بنانے کا طریقہ
سرسوں کا تیل ۔۔ 50 گرام
میتھی دانہ ۔۔ آدھا چائے کا چمچ
لہسن ۔۔ دو عدد جوے
چھلی ہوئی پیاز۔۔ 20 گرام
ان چاروں اشیاء کو ملاکر ایک برتن میں انتی دیر تک پکائیں ہے کہ پیاز جل کر سرخ ہوجائے اس کے بعد اسے چھان کر رکھ لیں۔ پیاز کا تیل تیار ہے۔
لگانے کا طریقہ
اس کو لگانے کا طریقہ یہ ہے کہ ہفتے میں 3 مرتبہ رات کو سونے سے پہلے متاثرہ مقام پر لگا کر اچھے سے مالش کریں اور صبح دھولیں اس سے بالوں کی خشکی کا خاتمہ، افزائش میں بہتری اور خوبصورتی میں بھی اضافہ ہوگا۔
اس کے علاوہ خاص طور پر وہ لوگ جن کو بالوں میں خشکی کی بہت زیادہ شکایت ہے ان کا مسئلہ بھی جلد حل ہوجائے گا۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔