کراچی : محکمہ موسمیات نے کراچی میں شدید بارشوں کی پیش گوئی کرتے ہوئے اربن فلڈنگ کا خدشہ ظاہر کردیا۔

تفصیلات کے مطابق محکمہ موسمیات نے آئندہ ہفتے کراچی میں شدید بارشوں کی پیش گوئی کردی۔

محکمہ موسمیات کی جانب سے کہا گیا کہ نیا مون سون سسٹم 17 اگست کی رات بھارت کے گجرات سے سندھ میں داخل ہوگا، جس کے باعث 18 اگست سے 23 اگست کے دوران سندھ کے مختلف علاقوں میں بارشیں متوقع ہیں۔

اس دوران کراچی میں بھی ایک سے دو بارش کے اسپیل برسنے کا امکان ہے، جس کے باعث اربن فلڈنگ کا خدشہ ہے۔

دوسری جانب پنجاب پروونشل ڈیزاسٹر مینجمنٹ اتھارٹی (PDMA) نے یومِ آزادی کے موقع پر لاہور سمیت پنجاب کے مختلف شہروں میں شدید بارشوں کی وارننگ جاری کردی ہے۔

مزید پڑھیں : کلاؤڈ برسٹ : کیا بادل پھٹنے کی پیش گوئی کی جاسکتی ہے؟

ڈی جی پی ڈی ایم اے عرفان علی کاتھیا کے مطابق مون سون کا ساتواں مرحلہ شروع ہوچکا ہے جو 21 اگست تک جاری رہے گا۔

یہ اسپیل پچھلے مراحل کے مقابلے میں زیادہ شدید ہوسکتا ہے، جس سے بالائی دریا کے ایریاز اور پنجاب کے میدانی علاقوں میں شدید بارشیں متوقع ہیں۔