کوئٹہ : صوبے بھر میں دفعہ 144 کے نفاذ میں توسیع کرتے ہوئے 16 اگست سے آئندہ 15 روز تک ڈبل سواری پر پابندی عائد کردی گئی۔

تفصیلات کے مطابق بلوچستان حکومت نے صوبے بھر میں امن و امان کی صورتحال کے پیش نظر دفعہ 144 کے نفاذ میں مزید 15 دن کی توسیع کردی۔

اس حوالے سے باضابطہ نوٹیفکیشن بھی جاری کردیا گیا ہے، جس میں کہا ہے کہ 16 اگست سے آئندہ 15 روز تک صوبے میں ڈبل سواری پر پابندی عائد ہوگی۔

اس کے علاوہ اسلحے کی نمائش اور پانچ یا اس سے زائد افراد کے اجتماع پر بھی پابندی برقرار رہے گی۔

واضح رہے کہ اس سے قبل یکم اگست سے 15 اگست تک صوبے بھر میں دفعہ 144 نافذ کی گئی تھی، جسے اب مزید دو ہفتوں کے لیے بڑھا دیا گیا ہے۔

مزید پڑھیں : بلوچستان میں 31 اگست تک موبائل انٹرنیٹ سروس بند

خیال رہے بلوچستان بھر میں تھری جی اور فورجی موبائل انٹرنیٹ سروسز بند ہے ، جس کے باعث صارفین کو شدید مشکلات کا سامنا ہے

محکمہ داخلہ کی جانب سے جاری کیے گئے مراسلے میں کہا گیا تھا کہ سیکیورٹی خدشات کے پیش نظر بلوچستان کے تمام اضلاع میں موبائل انٹرنیٹ سروسز بند کرنے کی ہدایت کی گئی ہے۔

مراسلے میں سفارش کی گئی ہے کہ انٹرنیٹ سروسز کو 31 اگست 2025 تک معطل رکھا جائے اور تمام اضلاع میں سیکیورٹی اقدامات کے تحت تھری جی اور فورجی سروسز بند کی جائیں۔