اسرائیل کا یمنی دارالحکومت صنعا کے قریب پاور پلانٹ پر بڑا حملہ

اسرائیل کا یمنی دارالحکومت صنعا کے قریب پاور پلانٹ پر بڑا حملہ

صنعا (17 اگست 2025): اسرائیل کی بحریہ نے یمن کے دارالحکومت صنعا کے قریب پاور پلانٹ پر بڑا حملہ کر دیا۔

قطری نشریاتی ادارے الجزیرہ کی رپورٹ کے مطابق المسیرہ ٹی وی نے بتایا کہ اسرائیلی جارحیت سے ہیزیاز پاور پلانٹ کے جنریٹرز کو نقصان پہنچا جس سے آگ بھڑک اٹھی تاہم بعد میں اس پر قابو پا لیا گیا۔

یمن کے نائب وزیر اعظم نے حملے کی تصدیق کرتے ہوئے کہا کہ ہنگامی عملہ مزید نقصان کو روکنے میں کامیاب رہا، صنعا کے رہائشیوں نے بھی کم از کم دو زوردار دھماکوں کی آوازیں سنیں۔

اسرائیلی فوج نے اپنے بیان میں دعویٰ کیا کہ پاور پلانٹ حوثیوں کے زیر استعمال تھا، تاہم اس نے ثبوت پیش نہیں کیے جس سے معلوم ہوتا ہے کہ یہ حملہ جنگی کرائم کی کڑی ہے۔

بیان میں اسرائیلی فوج نے بتایا کہ یہ حملہ حوثیوں کے بار بار کیے جانے والے حملوں کا براہ راست جواب تھا جس میں میزائل اور ڈرون اسرائیل کی جانب داغے گئے تھے۔

غزہ میں اسرائیل کی نسل کشی کے جواب میں حوثیوں نے 2023 سے اسرائیل پر بارہا راکٹ اور ڈرون فائر کیے ہیں۔

اسرائیل نے یمن کے بنیادی ڈھانچے پر بمباری کر کے جوابی کارروائی کی جس میں حدیدہ بندرگاہ بھی شامل ہے جو انسانی امداد کی ترسیل کیلیے اہم لائف لائن ہے۔

اسرائیل نے یمن کے بین الاقوامی ہوائی اڈے پر بھی حملہ کیا اور اس کا دعویٰ ہے کہ یہ بھی حوثیوں کے زیر استعمال ہے۔

امریکہ اور برطانیہ نے بھی یمن میں بمباری کی کیونکہ حوثیوں نے بحیرہ احمر سے گزرنے والے اسرائیل سے منسلک بحری جہازوں پر حملہ کیا تھا۔