پشاور (18 اگست 2025): وزیراعلیٰ خیبر پختونخوا علی امین گنڈاپور نے اپنی ایک ماہ اور وزرا نے 15 دن کی تنخواہ سیلاب زدگان کو عطیہ کرنے کا فیصلہ کیا ہے۔
اے آر وائی نیوز کے مطابق خیبر پختونخوا کے وزیراعلیٰ علی امین گنڈاپور نے سیلاب متاثرین کی مدد کے لیے بڑا قدم اٹھاتے ہوئے اپنی ایک ماہ کی تنخواہ سیلاب زدگان کی امداد کے لیے دینے کا فیصلہ کیا ہے، جب کہ صوبائی کابینہ کے ارکان 15 دن کی تنخواہ سیلاب زدگان کے لیے عطیہ کریں گے۔ اراکین صوبائی اسمبلی اپنی 7 دن کی تنخواہ سیلاب زدگان کی مدد کے لیے دیں گے۔
اس کے علاوہ سرکاری ملازمین بھی سیلاب زدگان کے لیے اپنی تنخواہ کا کچھ حصہ عطیہ کریں گے۔ گریڈ 17 اور اس سے زائد گریڈ کے افسران اپنی دو دن کی تنخواہ جب کہ گریڈ ایک سے 16 تک کے ملازمین اپنی ایک دن کی نتخواہ سیلاطب زدگان کی امداد کے لیے دیں گے۔
وزیراعلیٰ علی امین گنڈاپور نے ان عطیات کے شفاف استعمال کے لیے بھی طریقہ کار وضع کرنے کا فیصلہ کیا ہے۔ اس مقصد کے لیے پی ڈی ایم اے میں خصوصی اکاؤنٹ کھولا جائے اور اس فنڈ کی ایک ایک پائی کا حساب رکھنے کے ساتھ عوام کو بھی آگاہ کیا جائے گا۔
علی امین گنڈاپور نے کہا کہ سیلاب زدگان ہماری خصوصی توجہ اور تعاون کے مستحق ہیں۔ مشکل گھڑی میں ہم سب کو دل کھول کر متاثرین کی مدد کرنی چاہیے۔
اس سے قبل وزیراعلیٰ کے پی نے سیلاب متاثرین کے لیے معاوضہ دُگنا کرنے کا اعلان کیا تھا۔ اس اعلان کے تحت اب جاں بحق لوگوں کے ورثا کو 10 کے بجائے 20 لاکھ روپے دیے جائیں گے۔
واضح رہے کہ رواں برس مون سون خاص طور پر کے پی اور گلگت بلتستان کے لیے قدرتی آفت بن کر آیا۔ حالیہ چند دن میں صوبہ خیبر پختونخوا میں کلاؤڈ برسٹ، طوفانی بارشوں، لینڈ سلائیڈنگ، سیلابی ریلوں اور بجلی گرنے کے واقعات میں 300 سے زائد افراد جاں بحق جب کہ اربوں روپے مالیت کی عوامی املاک، مویشی، زرعی زمینیں تباہ اور سرکاری انفرااسٹرکچر برباد ہو گیا ہے۔
کے پی کے سیلاب متاثرین کے لیے پاکستان بھر سے امدادی سرگرمیاں جاری ہیں۔ پاک فوج نے اپنی ایک دن کی تنخواہ اور ایک دن کا راشن سیلاب متاثرین کو عطیہ کر دیا ہے۔
https://urdu.arynews.tv/kp-flood-victims-special-compensation-package-doubled/