وزیراعظم شہباز شریف نے کے پی کے سیلاب متاثرین کے لیے وفاقی کابینہ کی ایک ماہ کی تنخواہ عطیہ کرنے کا اعلان کردیا۔
وزیراعظم شہباز شریف کی زیر صدارت بالائی علاقوں میں طوفانی بارشوں، سیلاب متاثرین کے لیے امدادی سرگرمیوں سے متعلق اجلاس ہوا جس میں کے پی میں بارشوں، سیلاب متاثرین کی مدد کے لیے وفاقی اداروں کو مزید متحرک ہونے کی ہدایت کی گئی۔
انہوں نے کہا کہ یہ سیاست کا نہیں، خدمت اور لوگوں کے دکھوں پر مرہم رکھنے کا وقت ہے، مصیبت زدہ بہن بھائیوں کی مدد ہماری قومی ذمہ داری ہے، متاثڑین کو وزیراعظم پیکیج کے تحت امدادی رقوم دیں گے۔
شہباز شریف کا کہنا تھا کہ این ڈی ایم اے فوری متاثرہ علاقوں میں نقصانات کا حتمی جائزہ پیش کرے، متاثرین میں امدادی اشیا کی تقسیم کا جامع لائحہ عمل پیش کیا جائے۔
یہ پڑھیں : صوابی میں کلاؤڈ برسٹ سے 12 گھر ڈوب گئے، 15 افراد کے جاں بحق ہونے کی اطلاعات
وزیراعظم نے کہا کہ امدادی اشیا کی تقسیم و بحالی کے آپریشن کی نگرانی وفاقی وزیر امیر مقام کریں گے، بجلی، پانی، سڑکوں اور دیگر سہولتوں کی بحالی کی نگرانی متعلقہ وفاقی وزرا کریں گے، تمام متعلقہ وزرا خیبرپختونخوا، آزاد کشمیر اور گلگت بلتستان خود جائیں، این ایچ اے شاہراہوں کی بحالی میں صوبائی یا قومی شاہراہوں میں تخصیص نہ کرے۔
انہوں نے کہا کہ امداد کے لیے راستے کھولنا پہلی ترجیح رکھی جائے، وزارت مواصلات متاثرہ علاقوں میں خود جاکر بحالی آپریشن کی نگرانی کریں، بجلی کا نظام ترجیحی بنیادوں پر بحال کروائیں۔
علاوہ ازیں وزیراعظم نے وزارت خزانہ کو این ڈی ایم اے کو ضروری وسائل فراہم کرنے کی ہدایت کی اور کہا کہ متاثرین کی امداد اور بنیادی انفرا اسٹرکچر کی بحالی تک وزرا متاثرہ علاقوں میں رہیں۔