واشنگٹن (22 اگست 2025): امریکی صدر ڈونلڈ ٹرمپ نے اعلان کیا ہے کہ وہ نیشنل گارڈز کے ہمراہ دارالحکومت کی سڑکوں پر گشت کریں گے۔
اے پی پی کی رپورٹ کے مطابق ڈونلڈ ٹرمپ نے کہا کہ واشنگٹن ڈی سی کو درپیش کرائم ایمرجنسی سے نمٹنے کیلیے طاقت کا مظاہرہ کرنا ضروری ہے۔
یہ اعلان ایسے وقت سامنے آیا جب بدھ کو نائب صدر جے ڈی وینس کو واشنگٹن میں تعینات فوجیوں سے ملاقات کے دوران عوام کی طرف سے شدید ردعمل کا سامنا کرنا پڑا، ان کے خلاف نعرے بازی بھی ہوئی۔
واشنگٹن میں 800 نیشنل گارڈ تعینات کیے گئے ہیں جبکہ ری پبلکن اکثریتی ریاستوں اوہائیو، لوزیانا، مسی سیپی، ساؤتھ کیرولائنا، ٹینیسی اور ویسٹ ورجینیا نے مزید ایک ہزار 200 اہلکار بھیجے ہیں۔
یہ نیشنل گارڈز نیشنل مال، یادگاروں، بیس بال سٹیڈیم اور شہر کی دوسری اہم جگہوں پر تعینات دیکھے گئے ہیں۔ کچھ شہریوں کی جانب سے ان اقدامات کا خیر مقدم کیا گیا جبکہ متعدد نے شکایت کی کہ یہ طاقت کا غیر ضروری مظاہرہ ہے اور یہ ان علاقوں میں نظر ہی نہیں آ رہا جہاں جرائم کی شرح زیادہ ہے۔
ری پبلکن سیاست دانوں کا الزام ہے کہ واشنگٹن جرائم، بے گھر افراد کی بڑھتی تعداد اور بدانتظامی کا شکار ہے تاہم پولیس کے اعداد و شمار کے مطابق کووڈ 19 کے بعد بڑھنے والے جرائم کی شرح میں 2023 اور 24 کے دوران نمایاں کمی آئی ہے۔