’جماعت اسلامی کے ٹاؤنز کو ایک روپے کا ترقیاتی فنڈ بھی نہیں دیا گیا‘

میئر کراچی مرتضیٰ وہاب کی پریس کانفرنس پر ترجمان جماعت اسلامی کا ردعمل آگیا۔

ترجمان جماعت اسلامی کا کہنا ہے کہ بوکھلاہٹ کا شکار ناکام میئر عوام کو گمراہ کر رہے ہیں  سندھ حکومت کی جانب سے ٹاؤنز کو ملنے والی او زیڈ ٹی صرف سرکاری ملازمین کی تنخواہوں کی مد میں ہے، دو سال میں جماعت اسلامی کے ٹاؤنز کو ایک روپے کا ترقیاتی فنڈ بھی نہیں دیا گیا۔

ترجمان نے کہا کہ سندھ حکومت کے پاس عوامی مسائل حل کرنے کا کوئی منصوبہ نہیں، شہر کو کھنڈر بنانے والے اپنی ناکامی چھپانے کے لیے پروپیگنڈہ کر رہے ہیں کراچی کے عوام ٹیکس دیتے ہیں مگر شہر میں ترقیاتی کام صفر ہے۔

ان کا کہنا تھا کہ پیپلز پارٹی اور اس کے ناکام میئر عوام دشمن پالیسیوں پر گامزن ہیں کراچی کے ٹاؤنز کو فنڈز سے محروم رکھنا کھلی ناانصافی ہے۔

مرتضیٰ وہاب نے پریس کانفرنس میں دعویٰ کیا تھا کہ جماعت اسلامی کے ٹاونز کو اب تک 27 ارب دئیے جا چکے ہیں۔

ان کا کہنا تھا کہ ہم بھی غلطیوں سے سیکھتے ہیں ہم سے یہ غلطی ہوئی کہ ٹریفک کا بندوبست نہیں کیا، شارع فیصل 3 جگہ سے چوک ہوئی اس سے پورے کراچی کا نظام درہم برہم ہوا۔