بھارت کے کامیڈی شو ’دی گریٹ انڈین کپل شو‘ کے سیٹ پر دو اداکار لڑ پڑے جس کی ویڈیو سوشل میڈیا پر وائرل ہوگئی۔
دی گریٹ انڈین کپل شو کے سیٹ پر کرشنا ابھیشیک اور ککو شاردہ کے درمیان تلخ کلامی کی ویڈیو سوشل میڈیا کی زینت بن گئی۔
ویڈیو میں کرشنا اور ککو کے درمیان کسی معاملے پر تلخ کلامی دیکھی جاسکتی ہے جسے دیکھ کرمداح بھی حیران رہ گئے۔
بھارتی میڈیا نے ذرائع کا حوالہ دیتے ہوئے بتایا کہ گزشتہ کچھ دنوں سے ان دونوں اداکاروں کے درمیان مسائل کی افواہیں گردش کر رہی تھیں اور یہ ویڈیو ان قیاس آرائیوں کو مزید بڑھا رہی ہے۔
ویڈیو میں کِکو شاردہ کرشنا سے ناراضگی کا اظہار کرتے ہوئے کہتے ہیں کہ انہیں پہلے اپنی بات مکمل کرنی چاہیے، جبکہ کرشنا تحمل کا مظاہرہ کرتے ہوئے تنازع سے بچنے کی کوشش کرتے ہیں اور کہتے ہیں کہ وہ اپنی آواز اونچی نہیں کرنا چاہتے۔
تاہم کِکو شاردہ کا کہنا ہے کہ کرشنا ان کی بات کو غلط انداز میں لے رہے ہیں۔
ویڈیو میں شو کے میزبان کپل شرما موجود نہیں ہیں لیکن سیٹ پر موجود دیگر عملہ دونوں کے درمیان صلح کروانے کی کوشش کررہا ہے۔
شو کی انتظامیہ کی جانب سے تاحال اس معاملے پر کوئی بیان جاری نہیں کیا گیا ہے۔