ایف آئی اے بلوچستان زون نے 4 بنگلادیشی شہریوں کی غیرقانونی طور پر ایران جانے کی کوشش ناکام بنادی۔
اے آر وائی نیوز کے مطابق ایف آئی اے اینٹی ہیومن ٹریفکنگ سرکل کوئٹہ نے کارروائی کرتے ہوئے بدنام زمانہ ایجنٹ نادر اور ساتھی حیدر کو گرفتار کرلیا۔
ترجمان ایف آئی اے کا کہنا ہے کہ 4 بنگلادیشی شہریوں کو بھی حراست میں لیا گیا ہے۔
یہ پڑھیں: ایف آئی اے نے 2 خطرناک اشتہاری ملزم کو یو اے ای سے گرفتار کرلیا
ایف آئی اے حکام کے مطابق ملزمان غیرقانونی طور پر ایران جانے کی کوشش کرتے ہوئے پکڑے گئے ہیں، بنگلادیشی شہریوں میں عتیق الرحمان، شمن، خیر الحسن اور رتن علی شامل ہیں۔
ابتدائی تفتیش کے مطابق ملزمان غیرقانونی طور پر پاکستان میں داخل ہوئے، ملزمان ایجنٹوں کی مدد سے ایران جانے کی کوشش کررہے تھے۔
ایف آئی اے حکام کا کہنا ہے کہ ملزمان کو خفیہ اطلاع پر گرفتار کیا گیا ہے، مزید تفتیش جاری ہے۔