پشاور (26 اگست 2025): الیکشن کمیشن آف پاکستان کو رہنما پاکستان تحریک انصاف (پی ٹی آئی) زرتاج گل کے خلاف مزید کارروائی سے روک دیا گیا۔
سابق وفاقی وزیر زرتاج گل کی الیکشن کمیشن کے نااہلی فیصلے کے خلاف درخواست پر سماعت پشاور ہائیکورٹ کے جسٹس وقار احمد اور جسٹس اعجاز خان پر مشتمل بینچ نے کی۔
زرتاج گل کے وکیل نے پشاور ہائیکورٹ کو بتایا کہ فیصل آباد کی انسداد دہشتگردی عدالت (اے ٹی سی) نے درخواست گزار کو 10 سال قید کی سزا سنائی، الیکشن کمیشن نے دیگر ممبران کے ساتھ درخواست گزار کو بھی نااہل قرار دیا۔
یہ بھی پڑھیں: زرتاج گل کو عدالت سے بڑا ریلیف مل گیا
جسٹس وقار احمد نے استفسار کیا کہ آپ لاہور ہائیکورٹ کیوں نہیں گئے؟ وکیل درخواست گزار نے بتایا کہ لاہور نہ جانے کی کچھ وجوہات ہیں عمر ایوب اور شبلی فراز کی اس طرح کی درخواستیں یہاں پر زیر سماعت ہیں، ان دونوں کو بھی اسی کیس میں نااہل کیا گیا۔
جسٹس وقار احمد نے کہا کہ دیگر درخواستوں کے ساتھ اس کو بھی سنیں گے، آئندہ سماعت پر اس کیس کی دائرہ اختیار پر بھی آپ کو سنیں گے۔
پشاور ہائیکورٹ نے الیکشن کمیشن کو زرتاج گل کے خلاف مزید کارروائی سے روکتے ہوئے فریقین کو نوٹس جاری کیا اور 14 دن میں جواب طلب کیا۔