لاہور: رائیونڈ میں 30 روپے کی خاطر 2 بھائیوں کے قتل کے مرکزی ملزم کو گرفتار کرلیا گیا۔
ڈی آئی جی آپریشنز کے مطابق مرکزی ملزم شہزاد کو ٹیکنالوجی سمیت دستیاب وسائل بروئے کار لاکر گرفتار کیا گیا ہے، 6 نامزد ملزمان کی گرفتاری کے لیے اسپیشل ٹیم تشکیل دی گئی تھی۔
ڈی آئی جی نے بتایا کہ دوہرے قتل کا اندوہناک واقعہ 21 اگست کو رائیونڈ میں پیش آیا تھا، پھل فروش ملزمان نے معمولی تنازع پر 2 بھائیوں کو تشدد کرکے قتل کیا۔
انہوں نے کہا کہ وقوعہ کے بعد مرکزی ملزم روپوش ہوگیا تھا۔گزشتہ روز مرکزی ملزم اویس کو گرفتار کیا گیا تھا، ملزم کی نوجوان کوبلا مارنے کی فوٹیج سامنے آئی تھی۔
واضح رہے لاہور کے علاقہ تھانہ رائے ونڈ سٹی کے علاقے میں صرف 30 روپے کی خاطر پھل فروش نے اپنے ساتھیوں کے ساتھ مل کر دو بھائیوں پر بہیمانہ تشدد کیا تھا۔
یہ پڑھیں: صرف 30 روپے کی خاطر پھل فروش کے تشدد سے زخمی دوسرا بھائی بھی دم توڑ گیا
جھگڑے میں دونوں بھائی شدید زخمی ہو گئے تھے جنہیں اسپتال منتقل کیا گیا تھا، جہاں کچھ دیر بعد 21 سالہ واجد زخموں کی تاب نہ لاتے ہوئے دم توڑ گیا تھا جب کہ 17 سالہ راشد کو تشویشناک حالت میں اؔئی سی یو منتقل کیا گیا تھا، جہاں وہ زندگی اور موت کی کشمکش میں مبتلا رہنے کے بعد دم توڑ گیا تھا۔
بعد ازاں رائے ونڈ پولیس نے واقعہ کا مقدمہ نوجوانوں کے والد کی مدعیت میں درج کر کے ایک ملزم پھل فروش تیمور کو گرفتار کیا تھا۔
پولیس کا یہ بھی کہنا تھا کہ حملہ آور جب بھائیوں پر تشدد کر رہے تھے تو وہاں موجود ہجوم انہیں بچانے کی بجائے ویڈیو بناتا رہا، خون میں لت پت لڑکا اپنے بے ہوش بھائی کا سر گود میں لیے بیٹھا تھا، ایک ملزم نے آگے بڑھ کر زخمی بھائی کے سر پر زور سے بیٹ مارا تو وہ بھی بے ہوش ہو گیا۔