راولپنڈی: ہولی فیملی اسپتال میں ڈاکٹرز کی مبینہ غفلت سے 11 سالہ بچی جاں بحق ہوگئیں، بچی کو دو روز قبل اسپتال لایا گیا تھا۔
تفصیلات کے مطابق راولپنڈی میں ہولی فیملی اسپتال میں زیرِ علاج 11 سالہ کائنات مبینہ طور پر ڈاکٹرز کی غفلت کے باعث دم توڑ گئی۔
اہلِ خانہ نے بتایا کہ بچی کو دو روز قبل پیٹ میں شدید درد کے باعث اسپتال لایا گیا تھا جہاں اپینڈکس کا آپریشن کیا گیا۔
ورثاء نے الزام لگایا کہ ڈاکٹرز نے کائنات کو ضرورت سے زیادہ ادویات دیں، جبکہ آپریشن کے بعد پیٹ میں کسی چیز کے رہ جانے کا بھی خدشہ ظاہر کیا گیا۔
والدین کا کہنا تھا کہ ڈاکٹرز نے پیٹ میں رہ جانے والی چیز کو ادویات کے ذریعے ختم کرنے کی کوشش کی، تاہم بچی جانبر نہ ہو سکی۔
غم سے نڈھال ورثاء نے اسپتال انتظامیہ سے متعلقہ ڈاکٹرز کے خلاف فوری کارروائی کا مطالبہ کیا ہے۔
دوسری جانب ہولی فیملی اسپتال کی انتظامیہ نے واقعے کا نوٹس لیتے ہوئے تحقیقات کے لیے کمیٹی تشکیل دے دی ہے۔
انتظامیہ کا کہنا ہے کہ واقعے کی انکوائری رپورٹ جلد ایم ایس ہولی فیملی اسپتال کو پیش کی جائے گی۔