صادق آباد (30 اگست 2025): رحیم یار خان کے علاقے صادق آباد میں کچے کے ڈاکوؤں نے گڈز کمپنی کے دفتر سے 2 افراد کو اغوا کر لیا۔
تفصیلات کے مطابق پنجاب کی تحصیل صادق آباد میں 9 سے زائد ڈاکو اغوا کی ایک واردات میں گڈز ٹرانسپورٹ کمپنی کے دفتر سے دو ملازمین کو اٹھا کر لے گئے، جس کی سی سی ٹی وی فوٹیج بھی سامنے آ گئی ہے۔
فوٹیج میں ڈاکوؤں کو دفتر سے اسلحے کے زور پر ملازمین کو لے جاتے دیکھا جا سکتا ہے، واقعے کے دوران ایک ملازم نے آفس سے بھاگ کر اس وقت جان بچائی جب اس نے دیکھا کہ ڈاکوؤں کی اس کی جانب توجہ نہیں ہے۔
بیوی بچوں کو قتل کرنے والے ملزم کا لاہور پولیس نے انکاؤنٹر کر دیا
ڈاکوؤں کے ہاتھوں اغوا کیے گئے ملازمین میں عمران اور امجد شامل ہیں، ڈی پی او عرفان علی سموں نے واقعے کا نوٹس لے لیا ہے، اور مغویوں کی جلد بازیابی کی ہدایت کر دی ہے، ان کا کہنا تھا کہ کچے کی جانب جانے والے علاقے کی ناکہ بندی کر دی گئی ہے۔
ترجمان پولیس کا کہنا ہے کہ ڈی ایس پی بھونگ کی سربراہی میں ٹیمیں تشکیل دے دی گئی ہیں، اور پولیس اہلکار ڈاکوؤں کا تعاقب کر رہے ہیں، جلد مغویوں کو بازیاب کرا لیا جائے گا۔
واضح رہے کہ کچے کے ڈاکو سندھ اور پنجاب کی دریائی پٹی میں سرگرم مجرم گروہ ہیں، جو اغوا، بھتہ خوری اور قتل سمیت اپنی پرتشدد سرگرمیوں کے لیے مشہور ہیں۔ وہ شہریوں اور سیکیورٹی اہلکاروں کو اغوا کرتے ہیں، جسمانی تشدد کی ویڈیوز بناتے ہیں اور لاکھوں روپے تاوان کا مطالبہ کرتے ہیں۔ تاوان ادا نہ کیے جانے کی صورت میں وہ یرغمالیوں کو بے دردی سے قتل کر دیتے ہیں۔