ARYNews.tv | Urdu – Har Lamha Bakhabar

’دنیا بھر کے سکھوں کا سر فخر سے بلند ہوگیا‘: سکھ برادری کا فیلڈ مارشل کو خراج تحسین

سکھوں کا سر فخر سے بلند ہوگیا، سکھ برادری کا فیلڈ مارشل کو خراج تحسین

Written by

ویب ڈیسک

in

(30 اگست 2025): سکھ برادری نے فیلڈ مارشل آرمی چیف جنرل عاصم منیر کی جانب سے سیلاب سے متاثرہ کرتارپور کا دورہ کرنے اور پاک فوج کی بروقت امدادی کارروائیوں پر انہیں خراج تحسین پیش کیا۔

فیلڈ مارشل آرمی چیف جنرل عاصم منیر نے دربار صاحب کرتارپور دورے کے موقع پر سکھ برادری سے خطاب کیا اور ان کی عبادت گاہوں کی جلد مکمل بحالی کی یقین دہانی کروائی۔ اس پر سکھ کمیونٹی نے سپہ سالار کو نہ صرف خراج تحسین پیش کیا بلکہ ان کے دورے اور بروقت امدادی کارروائیوں کو بھرپور الفاظ میں سراہا۔

سکھ رہنما رمیش سنگھ نے کہا کہ بروقت امدادی کارروائیوں پر فیلڈ مارشل آرمی چیف جنرل عاصم منیر کا تہہ دل سے شکریہ ادا کرتے ہیں، دورے کے دوران انہوں نے کہا کہ جہاں ضرورت ہوگی ہمارے ہیلی کاپٹر موجود ہوں گے۔

یہ بھی پڑھیں: فیلڈ مارشل کا پنجاب کے سیلاب سے متاثرہ علاقوں کا دورہ، سکھ برادری سے ملاقات

رمیش سنگھ نے کہا کہ پاکستان ہماری دھرتی اور ہماری جان ہے، پاکستان اور سکھ برادری کا رشتہ ایسے ہے جیسے ناخن کا گوشت کے ساتھ، پاکستان اور سکھوں کا رشتہ ہمیشہ قائم و دائم رہے گا، فیلڈ مارشل کے سکھ برادری کے ساتھ بیٹھنے سے پوری دنیا کے سکھوں کا سر فخر سے بلند ہوگیا۔

انہوں نے کہا کہ دنیا کو پتا چلے گا کہ سپہ سالار نے خود کرتارپور کا دورہ کیا تو سکھوں کامان مزید بڑھے گا، دنیا بھر کے سکھ آ کر کہتے ہیں کہ پاکستان اقلیتوں کیلیے محفوظ ترین ملک ہے، سکھ یاتری جب پاکستان سے واپس جاتے ہیں تو ان کی آنکھوں میں آنسو ہوتے ہیں، سکھ یاتری کہتے ہیں کہ جتنا پیار ملا ہے دل نہیں کرتا کہ پاکستان چھوڑ کر واپس جائیں۔

دیگر سکھ رہنماؤں نے بھی بروقت امدادی کارروائیوں پر آرمی چیف کا شکریہ ادا کیا۔

انہوں نے کہا کہ فیلڈ مارشل نے جو سکھ برادری کا مان بڑھایا ہے پوری دنیا کے سکھوں کی طرف سے ان کا تہہ دل سے شکریہ کرتے ہیں، سیلاب کے بعد 24 گھنٹے کے دوران جو انہوں نے کیا اس کیلیے ہمارے پاس الفاظ نہیں، دنیا بھر کے سکھوں کا سر پاکستان کی طرف عقیدت و احترام کے ساتھ جھکتا ہے۔

ان کا کہنا تھا کہ دنیا بھر کے سکھوں کا پیار اور ہمدردیاں پاکستان کے ساتھ ہیں، پوری دنیا کے سکھ آپ کے شکرگزار ہیں، پاکستان ہمارے لیے حقیقی طور پر جنت ہے، پاک فوج قدرتی آفت میں عوام کی ہر ممکن مدد کیلیے ہمیشہ پیش پیش رہتی ہے۔

More posts