لاہور: بھارت سے چھ سو سے زائد سکھ یاتری جوڑ میلے میں شرکت کے لیے واہگہ کے راستے پاکستان پہنچ گئے، جن کا استقبال چیئرمین متروکہ وقف املاک بورڈ صدیق الفاروق نے کیا۔
سکھ یاتریوں کے پانچویں روحانی پیشوا گرو ارجن دیو سنگھ کے چارسونویں شہیدی دیہاڑ کی تقریبات سولہ جون کو لاہور میں ہوں گی، سکھ یاتری لاہور کے علاوہ ننکانہ صاحب، فاروق آباد، حسن ابدال اور نارروال میں اپنی مذہبی رسومات کی ادائیگی کے بعد اٹھارہ جون کو واہگہ کے راستے ہی بھارت روانہ ہوں گے۔
پاکستان داخل ہونے کے موقع پر میڈیا سے گفتگو کرتے ہوئے سکھ یاتریوں کا کہنا تھا کہ پاکستان کی سرزمین ان کے لیے بہت مقدس ہے کیونکہ ان کے زیادہ تر روحانی پیشواؤں کے جنم یا شہیدی استھان پاکستان میں ہی ہیں۔
انہوں نے بہترین انتظامات کیے جانے پر حکومت پاکستان کا شکریہ ادا کیا، اس موقع پر چیئرمین متروکہ وقف املاک بورڈ صدیق الفاروق کا کہنا کہ سکھ یاتریوں کی سکیورٹی کے لیے بہترین انتظامات کیے گئے ہیں۔