جعلی ویزے پر عراق جانے والے ملزم کو گرفتار کرلیا گیا

کراچی: عراق سے آنے والے مسافر کو گرفتار کر لیا گیا، ایف آئی اے حکام نے بتایا کہ ملزم سمیع اللہ کے پاسپورٹ پر عراق کا جعلی ویزا لگا ہوا تھا۔

اے آر وائی نیوز کے مطابق ایف آئی اے امیگریشن نے کراچی ایئرپورٹ پر کارروائی کرتے ہوئے عراق سے آنے والے مسافر کو گرفتار کر لیا، ملزم پچھلے سال جولائی میں بھی عراق جا چکا ہے۔

ترجمان ایف آئی اے نے بتایا کہ گرفتار کیے جانے والے ملزم سمیع اللہ کے پاسپورٹ پر عراق کا جعلی ویزا لگا ہوا تھا۔

ابتدائی تفتیش میں یہ بات سامنے آئی ہے کہ ملزم جولائی 2022 میں ایران گیا تھا، ملزم نے ایجنٹ کی مدد سےعراق کا ویزا حاصل کیا۔

ایف آئی اے کے حکام نے اس حوالے سے مزید بتایا کہ گرفتار ملزم کو قانونی کارروائی کے لیے اینٹی ہیومن ٹریفکنگ سرکل کراچی منتقل کردیا گیا ہے۔