پشاور : باچا خان ایئرپورٹ پر سونے کی اسمگلنگ میں ملوث پی آئی اے اہلکاروں کے خلاف کارروائی کا آغاز کرتے ہوئے گروپ 5 کے 2 سیکیورٹی سپر وائزروں کو معطل کردیا۔

تفصیلات کے مطابق باچا خان انٹرنیشنل ائرپورٹ پر سونے کی اسمگلنگ میں ملوث پی آئی اے اہلکاروں کی گرفتاری کا معاملہ پی آئی اے انتظامیہ نے ایکشن لے لیا۔

ترجمان نے بتایا کہ پشاور ائیرپورٹ پر اسمگلنگ میں ملوث پی آئی اے گروپ 5 کے دو سیکورٹی سپر وائزروں کو انتظامیہ نے شوکاز نوٹس جاری کر کے انضباطی کا روئی کا آغاز کردیا۔

گذشتہ روز باچا خان انٹرنیشنل ایئرپورٹ پشاور پر سونے کی اسمگلنگ کی بڑی کوشش ناکام بناتے ہوئے پی آئی اے کے دو اہلکاروں کو گرفتار کر کے کروڑوں روپے مالیت کا سونا برآمد کر لیا تھا۔

مزید پڑھیں : پی آئی اے کے اہلکار سونا اسمگل کرتے ہوئے پکڑے گئے

ترجمان ایف آئی اے کا کہنا تھا کہ ایف آئی اے کمرشل بینکنگ سرکل پشاور اور اے ایس ایف نے مشترکہ کارروائی کرتے ہوئے ملزمان ناصر خان اور شاہد اللہ کو گرفتار کیا، دونوں ملزمان پشاور ایئرپورٹ پر تعینات تھے اور ان کے قبضے سے 7 ہزار 740 گرام سونا برآمد ہوا، جسے بیرون ملک اسمگل کیا جانا تھا۔

ترجمان کے مطابق ملزمان کو عدالت میں پیش کر کے دو روزہ جسمانی ریمانڈ حاصل کر لیا گیا ہے جبکہ ان سے مزید تفتیش جاری ہے تاہم دیگر ملوث افراد کی گرفتاری کے لیے بھی کارروائیاں کی جا رہی ہیں۔

ادھر پی آئی اے انتظامیہ نے بھی واقعے کا نوٹس لیتے ہوئے گروپ 5 کے دو سیکیورٹی سپروائزرز کو معطل کر دیا ہے اور ان کے خلاف انضباطی کارروائی کا آغاز کر دیا گیا ہے۔