میکسیکن اداکارہ مارسیلا الکازار روڈریگز رسم کی ادائیگی کے دوران مینڈک کا زہر پینے سے چل بسی۔
غیرملکی خبررساں ادارے کی رپورٹ کے مطابق 33 سالہ اداکارہ مارسیلا روڈریگز بیمار ہونے کے بعد اپنے جسم سے زہریلے یا بیمار کرنے والے مادوں کو نکالنے کی رسم کے دوران ہلاک ہوئیں۔
جنوبی امریکا میں یہ خطرناک روایت ہے جو کچھ علاقوں میں ادا کی جاتی ہے جس میں جسم کو زہریلے مادوں سے پاک کرنے کی کوشش کرنے والوں کو ایمازون کے بڑے مینڈکوں کا زہر پینا یا پھر اسے کسی طرح سے جسم میں داخل کرنا ہوتا ہے۔
رپورٹ کے مطابق ہفتے کے روز اداکارہ کو زہر پینے کے فوراً بعد الٹیاں ہونے لگی تھیں اور ان کی حالت مزید بگڑنے پر اسپتال منتقل کیا گیا جہاں وہ دوران علاج دم توڑ گئیں۔
اس رسم کے تحت ڈائریا اور الٹی کو جسم کو بیماری سے پاک کرنے اور شفا کا عمل سمجھا جاتا ہے تاہم اداکارہ کے ساتھ ایسا نہ ہوا اور وہ ہلاک ہوگئیں۔
اداکارہ کی موت کے بعد پولیس نے اس خطرناک رسم کا انتظام کرنے والوں کی تلاش شروع کردی ہے۔