پاکستان سپر لیگ 8 کے لیے کھلاڑیوں کی کراچی آمد جاری ہے اسلام آباد یونائیٹیڈ کے کپتان شاداب خان اور اہلیہ کا شادی کے بعد کراچی پہنچنے پر یادگار اسقبال کیا گیا۔
پاکستان سپر لیگ کے آٹھویں سیزن کا آغاز کل سے ہو رہا ہے۔ اس میگا ایونٹ میں شرکت کے لیے فرنچائز کے غیر ملکی اور ملکی کھلاڑیوں کی کراچی آمد جاری ہے۔ اسلام آباد یونائٹیڈ کے کپتان شاداب خان بھی شادی کے بعد اہلیہ کے ہمراہ کراچی پہنچے تو ساتھی کھلاڑیوں نے اپنے کپتان کا منفرد انداز میں استقبال کرکے ان کی آمد کو یادگار بنا دیا۔
سماجی رابطوں کی ویب سائٹ ٹوئٹر پر اسلام آباد یونائیٹیڈ کے آفیشل پیج سے جاری اس ویڈیو میں دیکھا جا سکتا ہے کہ شاداب کان اپنی اہلیہ کے ساتھ کراچی پہنچنے کے بعد جب ٹیم ہوٹل میں پہنچتے ہیں تو یونائٹیڈ کے ساتھی کھلاڑی اپنے کپتان کا کرکٹ بیٹس کے سائے میں ان کا پرتپاک استقبال کرتے ہیں۔
شاداب خان بھی اپنا یہ شاندار استقبال دیکھ کر کافی خوشگوار موڈ میں نظر آتے ہیں اور اسی پرجوش انداز میںاپنے ساتھیوں کی محبت کا جواب بھی دیتے ہیں جب کہ ان کے ساتھ نسیم شاہ بھی ہوٹل میں داخل ہوتے دکھائی دیتے ہیں۔
ویڈیو میں شاداب خان کو ساتھی کھلاڑیوں کے ہمراہ ہوٹل کے اندر ایک ہال نما کمرے میں بھی بیٹھا اور گفتگو کرتے دکھایا گیا ہے جس میں ان کے درمیان کافی دلچسپ گفتگو سنی جا سکتی ہے۔
کھلاڑی شاداب خان سے پوچھتے ہیں کہ آپ نے شادی کا تجربہ کرلیا اب آپ بتائیں کہ شادی کرنی چاہیے یا نہیں؟ جس پر کپتان جواب دیتے ہیں بھائیوں یہ تو قدرت کا نظام ہے، شادی ہونی ہی ہونی ہے۔ اچھی اور بری عادتیں قبر تک ساتھ جاتی ہیں۔
Thank you to my @IsbUnited family for so much love. #UnitedWeWin https://t.co/rfvVoFooAw
— Shadab Khan (@76Shadabkhan) February 11, 2023
اسلام آباد یونائیٹڈ کے آفیشل پیج پر جاری اس ویڈیو کو شاداب خان نے ری ٹویٹ کیا ہے اور فرنچائز فیملی کا شکریہ ادا کرتے ہوئے ان سے محبت کا اظہار بھی کیا۔
یاد رہے کہ شاداب خان کا نکاح گزشتہ ماہ سابق مایہ ناز اسپنر ثقلین مشتاق کی صاحبزادی سے ہوا تھا۔ حال ہی میں وہ اپنی دلہنیا کو رخصت کراکے اپنے گھر لے آئے ہیں۔