اسلام آباد : ائیر چیف مجاہد انور خان نے کہا ہے کہ پاک امریکہ مشترکہ مشقیں دونوں ممالک کی فضائی افواج کو ایک دوسرے کے تجربات سے سیکھنے میں معاون ثابت ہوں گی۔
یہ بات انہوں نے پاک فضائیہ کے آپریشنل ائیر بیس پر جاری پاک امریکہ مشترکہ فضائی مشقوں فیلکن ٹیلن کے معائنہ کے موقع پر گفتگو کرتے ہوئے کہی۔
تفصیلات کے مطابق پاک فضائیہ کے سربراہ ائیر چیف مجاہد انور خان کی پاکستان اور امریکی فضائیہ کی مشترکہ فضائی مشقوں فیلکن ٹیلن میں شرکت کی۔
ائیر چیف مارشل مجاہد انور خان نے اسلام آباد میں پاک فضائیہ کے ایک آپریشنل ائیر بیس پر جاری پاکستان اور امریکی فضائیہ کی مشترکہ فضائی مشقوں فیلکن ٹیلن کا معائنہ کیا۔
پاک فضائیہ کے سربراہ نے لڑاکا طیارہ اڑا کر جنگی مشقوں کے اختتامی مراحل میں شرکت کی، اس موقع پر گفتگو کرتے ہوئے ائیر چیف نے فضائی مشقوں کے کامیاب انعقاد پر دونوں ممالک کے فضائی عملے کو مبارک باد دی۔
انہوں نے کہا کہ دونوں ممالک کے برادرانہ تعلقات کی تاریخ ایک طویل عرصے پر محیط ہے اور یہ مشترکہ مشقیں دونوں ممالک کی فضائی افواج کو ایک دوسرے کے تجربات سے سیکھنے میں معاون ثابت ہوں گی۔
انہوں نے مزید کہا کہ ان مشقوں سے نہ صرف دو عظیم ملکوں بلکہ فضائی افواج کے درمیان تعاون کو مزید مستحکم بنانے میں بھی مدد ملے گا۔