بالی ووڈ کی معروف جوڑی ایشوریا رائے اور ابھیشیک بچن نے اپنی ازدواجی زندگی سے متعلق اہم انکشاف کردیا۔
بھارتی میڈیا پر چند ماہ سے ابھیشیک بچن اور ایشوریا رائے کے درمیان طلاق کی خبریں گردش کررہی ہیں لیکن بچن فیملی اور اداکارہ کی جانب سے اس کی تردید یا تصدیق نہیں کی گئی ہے۔
ایسے میں ابھیشیک بچن اور ایشوریا رائے کا 2010 میں دیا گیا انٹرویو وائرل ہورہا ہے۔
انٹرویو میں جوڑی سے پوچھا گیا تھا کہ آپ دونوں آپس میں ایک سال یا ایک مہینے میں کتنی بار لڑتے ہیں؟
جواب میں ایشوریا رائے نے کہا کہ ہم ہر روز لڑتے ہیں لیکن ابھیشیک نے وضاحت دی کہ ہماری لڑائی سنجیدہ نہیں ہوتی بلکہ ہمارے درمیان چھوٹی چھوٹی باتوں پر روزانہ کی نوک جھونک رہتی ہے۔
اداکار نے کہا کہ مجھے لگتا ہے کہ اگر ہمارے درمیان روزانہ نوک جھونک نہ ہو تو ہمارا رشتہ واقعی میں بورنگ ہوجائے گا۔
ایشوریا رائے کا کہنا تھا کہ مجھے ہم نئے شادی شدہ جوڑے جیسے نہیں لگتے کیونکہ ہم دونوں کے درمیان شادی سے پہلے دوستی کا رشتہ قائم ہوگیا تھا جس کی وجہ سے ہمارے لیے شادی کا رشتہ آسان رہا۔
واضح رہے کہ ابھیشیک بچن اور ایشوریا رائے کی شادی سال 2007 میں ہوئی تھی اور ان کے گھر بیٹی آرادھیا کی پیدائش سال 2011 میں ہوئی تھی۔