کراچی (20 جولائی 2025): سندھ حکومت نے اجرک والی جدد ریڈایبل نمبر پلیٹ پر اعتراض اٹھانے کو جرائم کی سہولت کاری کے مترادف قرار دے دیا۔
ترجمان سندھ حکومت گہنور خان اسران نے رہنما ایم کیو ایم فاروق ستار کی حالیہ پریس کانفرنس پر ردعمل دیتے ہوئے کہا کہ ایم کیو ایم آج بھی نفرت کے خول میں بند ہے، پیپلز پارٹی نے قومی یکجہتی کو فروغ دیا شہری و دیہی سندھ کو جوڑنے کا کام کیا۔
گہنور خان اسران نے کہا کہ فاروق ستار اور ان کی ایم کیو ایم کا ماضی کراچی کے عوام سے چھپا نہیں، جنہوں نے شہر کو ٹارگٹ کلنگ اور بھتہ خوری کا تحفہ دیا وہ آج تنقید کر رہے ہیں۔
یہ بھی پڑھیں: نئی نمبر پلیٹ کے حوالے سے شہریوں کیلیے بڑی خبر
ترجمان سندھ حکومت نے کہا کہ جدید ریڈایبل نمبر پلیٹ پر اعتراض کرنا جرائم کی سہولت کاری کے مترادف ہے، ایم کیو ایم نہیں چاہتی کہ لوگ نئی نمبر پلیٹ لگائیں اور جرائم کی روک تھام ہو۔
انہوں نے کہا کہ یہ جانتے ہیں جدید نمبر پلیٹ سے جرائم پیشہ عناصر کی شناخت اور گرفت ممکن ہوگی۔
ان کا کہنا تھا کہ مخدوش عمارتوں پر استعفے کا مطالبہ مضحکہ خیز سیاسی ڈرامہ ہے، ایم کیو ایم نے اپنے ادوار میں اداروں کو مفلوج کیا، سندھ حکومت پورے صوبے میں ترقیاتی کاموں کا جال بچھا رہی ہے۔
واضح رہے کہ رہنما ایم کیو ایم فاروق ستار نے اجرک والی نمبر پلیٹ کے حوالے سے سندھ حکومت کو مشورہ دیا۔
انہوں نے پارٹی رہنماؤں کے ہمراہ پریس کانفرنس کرتے ہوئے کہا کہ اجرک والی نمبر پلیٹ کی آڑ میں لوٹ مار کا نیا دھندا شروع کر دیا گیا ہے، صوبائی وزیروں کی گاڑیوں پر فینسی نمبر پلیٹ ہے۔
فاروق ستار نے صوبائی حکومت کو مشورہ دیا کہ نئی نمبر پلیٹ دینی ہے تو مفت میں دیں لوگ شوق سے لگائیں گے، پولیس والوں کو فری ہینڈ دیا گیا ہے چلان کریں جس سے کمیشن الگ ملتا ہے۔