لاہور: پاکستان تحریک انصاف کے رہنما علیم خان کے خلاف آف شورکمپنیز اورزائد اثاثہ جات پر سماعت آج ہوگی۔
تفصیلات کے مطابق جیل سے رہائی کے بعد پاکستان تحریک انصاف کے رہنما علیم خان کے خلاف پہلی بار کیس کی سماعت ہوگی۔
علیم خان آج احتساب عدالت میں پیش نہیں ہوں گے، وہ عمرے کی ادائیگی کے لیے سعودی عرب گئے ہوئے ہیں۔
عبدالعلیم خان کی ضمانت منظور، رہائی کا حکم
خیال رہے کہ رواں ماہ 15 مئی کو لاہور ہائی کورٹ نے پاکستان تحریک انصاف کے رہنما اور صوبہ پنجاب کے سابق سینیئر وزیرعلیم خان کی ضمانت کی درخواست منظور کی تھی۔
جسٹس علی باقر نجفی اور جسٹس سردار احمد نعیم پر مشتمل بینچ نے علیم خان کو دس دس لاکھ روپے کے ضمانتی مچلکے جمع کروانے کا حکم بھی دیا تھا۔
علیم خان کو نیب نے آمدن سے زائد اثاثے رکھنے اور اختیارات کے ناجائز استعمال کے الزامات میں رواں برس فروری میں گرفتار کیا تھا۔
پاکستان تحریک انصاف کے رہنما پنجاب کابینہ میں سینیئر وزیر کے عہدے پر فائز تھے اور بلدیات کے محکمے کا قلمدان بھی ان کے پاس تھا۔علیم خان نے نیب کی جانب سے گرفتاری پر اپنے صوبائی عہدوں سے استعفیٰ دیا تھا۔