وزیر اعلیٰ خیبرپختونخوا علی امین گنڈاپور نے کہا ہے کہ عوامی نمائندوں کو بلاوجہ نااہل کرکے ان کے حقوق چھینے جا رہے ہیں سابق حکومتوں کی کرپشن کو ہمارے خلاف ہتھیار بنایا جا رہا ہے جب کہ کوہستان اسکینڈل صوبے کا نہیں بلکہ وفاق کا معاملہ ہےمگر الزام ہم پر ڈالا جا رہا ہے۔
اپنے بیان میں علی امین گنڈاپور نے دعویٰ کیا کہ 17ماہ میں صوبے نے 250 ارب روپے سے زائد آمدنی حاصل کر کے تاریخ رقم کی، خیبرپختونخوا کو ترقی کی شاہراہ پر گامزن کر دیا ہے۔
انہوں نے کہا کہ ہمیں قرضوں میں ڈوبا ہوا اور تنخواہوں کے لالے پڑے صوبے کا چارج ملا، صوبے کو مالی تباہی سےنکال کر کامیابی کی طرف گامزن کر دیا، قرضوں کی ادائیگی کیلئے 190 ارب کا انڈومنٹ فنڈ قائم کیا اور ہدف 300 ارب ہے۔
علی امین کا کہنا تھا کہ خیبرپختونخوا شفافیت، خدمت اور ترقی میں ملک بھر میں مثال بن چکا ہے دہشت گردی کا خاتمہ اور عوام کا اعتماد بحال کرنا سب سے بڑی ترجیح ہے جرگوں کا دائرہ مزید وسیع کیا جائے گا، عوام کی رائے فیصلہ کن ہو گی۔
وزیراعلیٰ نے واضح کیا کہ پولیس و فوج کے شہداکا خون رائیگاں نہیں جائے گا عوامی رائے اور جرگوں کی مشاورت سے مضبوط حکمت عملی تیار کریں گے انتقامی کارروائیاں عروج پر ہیں مگر ہم پیچھے نہیں ہٹیں گے۔