مردان: پاکستان تحریک انصاف (پی ٹی آئی) کے رہنما علی محمد خان کا کہنا ہے کہ چیئرمین پی ٹی آئی میرے لیڈر ہیں اور وہ دوبارہ وزیر اعظم بنیں گے۔
علی محمد خان نے 80 دن بعد جیل سے رہائی پر میڈیا سے گفتگو میں کہا کہ میرا پیغام محبت ہے جس مشن کیلیے ساتھ دیا اللہ نے استقامت دی، پاکستان کو سیاسی انتقام کی نہیں بلکہ سیاسی استحکام کی ضرورت ہے، ملک کو پُرامن طریقے سے شفاف الیکشن کی طرف لے جانا چاہیے۔
پی ٹی آئی رہنما نے کہا کہ ہم سب پاکستانی ہیں کوئی غیر محب وطن یا دہشتگرد نہیں، 9 مئی کو جن لوگوں نے نقصان کیا وہ پارٹی پالیسی نہیں تھی جس نے غلطی کی سزا ملنی چاہیے، ہماری جماعت تعلیم یافتہ لوگوں کی ہے۔
انہوں نے کہا کہ ہمارے کارکن اسلامی فلاحی ریاست کیلیے کوشاں ہیں، سابق وزیر اعظم پر دہشتگردی کے مقدمات ملک کی بدنامی ہے، ملک کو آگے بڑھنا ہے تو کسی جماعت کو کارنر نہ کیا جائے، الیکشن میں فیصلہ عوام کو کرنے دیں۔
’نواز شریف، آصف علی زرداری اور مولانا فضل الرحمان کا الیکشن میں مقابلہ کریں گے۔ اداروں سے غلط فہمیوں کے خاتمے کیلیے کام کروں گا۔ جو لوگ ہمیں چھوڑ گئے انہیں برا بھلا نہیں کہتا۔ وہ وقت امتحان کا تھا اپنے لیڈر کے ساتھ کھڑے رہتے تو اچھا تھا۔‘
علی محمد خان نے کہا کہ مجھ پر دہشتگردی کا پرچہ کٹا کر ہتھکڑیاں پہنائی گئیں جس کا بڑا دکھ ہے، نجانے کس کو خوش کرنے کیلیے مجھے ہتھکڑیاں لگائی گئیں۔
انہوں نے کہا کہ سیاسی کارکن پاکستان کی بقا اور سلامتی کی کوشش کریں، ایک دوسرے کو دیوار کے ساتھ نہ لگائیں اس سے کسی کو فائدہ نہیں ہوگا، سیاسی نظام مضبوط ہوگا تو پاک فوج مضبوط ہوگی اور ملک مضبوط ہوگا۔