سعودی فرماں رواں خادم حرمین شریفین شاہ سلمان بن عبدالعزیز نے اہم شاہی فرمان جاری کرتے ہوئے جامعہ جدہ کے وائس چانسلر کو عہدے سے فارغ کردیا ہے۔
سعودی خبر رساں ادارے کے مطابق خادم الحرمین شریفین کی جانب سے یہ اقدام کنگ عبدالعزیز یونیورسٹی جدہ کے وائس چانسلر کہ ڈاکٹر عبدالرحمن بن عبید الیوبی پر غبن، منی لانڈرنگ، جعلسازی اور نجی مفادات کیلیے اثر ورسوخ کے ناجائز استعمال پر اٹھایا گیا ہے۔
رپورٹ کے مطابق جامعہ جدہ کے وائس چانسلر کی سبکدوشی کی سفارش کنٹرول اینڈ اینٹی کرپشن اتھارٹی نے کی تھی جس میں کہا گیا تھا کہ ڈاکٹر الیوبی جعلسازی، منی لانڈرنگ اور کنگ عبدالعزیز یونیورسٹی کے خزانے سے غبن نیز ذاتی مفاد کے لیے اثر و نفوذ کا ناجائز فائدہ اٹھا رہے تھے۔
وی سی کی سبکدوشی کے حوالے سے جاری شاہی فرمان میں تاکید کی گئی ہے کہ کنٹرول اینڈ اینٹی کرپشن اتھارٹی ڈاکٹر الیوبی کے حوالے سے قانونی کارروائی منطقی انجام تک پہنچائے اور اس حوالے سے تمام ضروری قانونی کارروائی کرے۔
تیسرے فرمان کے تحت مذکورہ احکام پر متعلقہ اداروں کو عمل درآمد کی ہدایت کی گئی ہے۔
شاہ سلمان نے ایک اور فرمان جاری کرکے ڈاکٹر ہشام بن عبدالرحمن بن عبداللہ آل الشیخ کو ہیومن رائٹس کمیشن کا معاون سربراہ مقرر کیا ہے جبکہ ایک اور فرمان کے ذریعے متعلقہ اداروں کو اس پر عمل درآمد کی ہدایت کی گئی ہے۔
خادم حرمین شریفین نے شہزادہ فہد بن محمد بن سعد بن عبدالعزیز کو الخرج کا کمشنر مقرر کردیا اور دوسرے شاہی فرمان کے ذریعے متعلقہ اداروں کو اس حوالے سے جاری کردہ شاہی فرمان پر عمل درآمد کی ہدایت دی ہے۔