کراچی : اینکر مرید عباس قتل کیس میں ملزم عاطف زمان کیخلاف گواہ نے سیشن عدالت میں بیانات ریکارڈ کرادیے۔
تفصیلات کے مطابق اینکر مرید عباس سمیت 2افرادکےقتل کیس میں 4 سال بعد پیش رفت سامنے آئی ، ملزم عاطف زمان کیخلاف گواہ نےسیشن عدالت میں بیانات ریکارڈکرادیے۔
گواہ نے بیان میں کہا کہ ملزم عاطف زمان نے بھائی عادل زمان کیساتھ مل کر 2 افراد کوقتل کیا۔
عدالت میں سی سی ٹی وی فوٹیج اوراستعمال اسلحےکی فرانزک رپورٹ کاجائزہ لیا گیا اور ملزمان کےوکیل نے گواہوں کے بیانات پر جرح مکمل کرلی، جس کے بعد ایڈیشنل سیشن جج نےآئندہ سماعت سرکاری گواہوں کو طلب کرلیا ہے۔
یاد رہے ملزم عاطف زمان نے2019 میں مرید عباس اورخضرحیات کو قتل کیاتھا جبکہ ملزم کا بھائی عادل زمان سپریم کورٹ سےضمانت خارج ہونے پر تاحال فرار ہے۔
یاد رہے کہ جولائی 2019 میں کراچی کے پوش علاقے ڈیفنس میں پیسوں کے لین دین کے تنازع پر ملزم عاطف زمان نے ٹی وی اینکر مرید عباس اور ان کے دوست خضرحیات کو فائرنگ کر کے قتل کر دیا تھا۔
ملزم عاطف زمان نے اس دہرے قتل کے بعد خود کو بھی گولی مار کر خودکشی کی کوشش کی تھی تاہم اسے بچا لیا گیا تھا۔
بعد ازاں اینکر قتل کیس میں ڈیڑھ سال بعد ملزم عاطف زمان پرفردجرم عائد کی گئی تھی تاہم ملزم نے صحت جرم سے انکار کردیا تھا۔
عدالت نے ملزم عادل زمان کا شناختی بلاک کرنے کے ساتھ ساتھ منقولہ اورغیر منقولہ جائیداد ضبط کرنے کا حکم دیا تھا جبکہ ملزم کا بھائی عادل زمان سپریم کورٹ سےضمانت خارج ہونے پر تاحال فرار ہے۔