کوئٹہ: پاکستان میں کروناوائرس کے دو کیسز رپورٹ ہونے کے بعد بلوچستان حکومت نے احتیاطی تدابیر اپناتے ہوئے تعلیمی ادارے بند رکھنے کا اعلان کردیا۔
اے آر وائی نیوز کے مطابق محکمہ تعلیم بلوچستان کا کہنا ہے کہ بلوچستان کے تمام تعلیمی ادارے 15مارچ تک بند رکھے جائیں گے جس کا مقصد کرونا وائرس سے حفاظتی اقدام اور بچوں کا تحفظ ہے۔
محکمے کی جانب سے جاری کردہ نوٹیفکیشن کے مطابق بلوچستان بھر کے تمام مدارس بھی بندرہیں گے، تعلیمی بورڈز تعطیلات کے دوران امتحانات نہیں لیں گے، تعطیلات کے باعث پرچے بعد میں لیے جائیں گے۔
پاکستان میں کرونا وائرس سے شکار ہونے والے دو افراد کی تفصیلات سامنے آگئیں، کراچی میں رپورٹ ہونے والے کرونا وائرس کے شخص کی شناخت یحییٰ جعفری کے نام سے ہوئی ہے جو زیارت کر کے چند روز قبل ایران سے کراچی پہنچا تھا۔
پاکستان میں کرونا وائرس کے 2 کیسز کی تصدیق
دوسرے شخص کا تعلق قبائلی علاقے سے ہے اور وہ بھی ایک ہفتے قبل ایران سے لاہور پہنچا تھا، متاثرہ شخص میں کرونا وائرس کی علامات ظاہر ہونے پر اسلام آباد کے پمز اسپتال منتقل کیا گیا جہاں خون کے نمونے لے کر قومی ادارہ صحت بھیجے گئے۔
ادھر ترجمان سندھ حکومت مرتضیٰ وہاب کا کہنا ہے کہ یحییٰ جعفری میں کرونا وائرس کی تصدیق ہوگئی ہے، مریض کو فوری طور پر آئسولیشن وارڈ منتقل کردیا گیا ہے۔
انہوں نے کہا کہ سیکریٹری ہیلتھ سے بات ہوئی انہوں نے تصدیق کی ہے، وفاقی حکومت کو ایئرپورٹ پر سرویلنس کی ضرورت ہے، معاملے سے نمٹنے کے لیے جو کٹس چاہیے ہوتی ہیں وہ ہمارے پاس موجود ہیں۔