الیکشن 3 ماہ کیلئے ملتوی کرانے کی ایک اور قرارداد سینیٹ میں جمع

اسلام باد: سینیٹ میں الیکشن ملتوی کرانے کی ایک اور قرارداد جمع کرادی گئی، جس میں کہا ہے کہ سیکیورٹی چیلنجز کے پیش نظر انتخابات 3ماہ کے لئے ملتوی کیے جائیں۔

تفصیلات کے مطابق الیکشن 3 ماہ کیلئے ملتوی کرانے کی ایک اور قرارداد سینیٹ میں جمع کرادی گئی، قرارداد آزاد پارلیمانی گروپ کے سینیٹر ہدایت اللہ نے جمع کرائی۔

قرارداد میں کہا گیا کہ سیکیورٹی چیلنجز کے پیش نظر انتخابات 3 ماہ کیلئے ملتوی کیے جائیں، سینیٹ الیکشن کمیشن اور سپریم کورٹ پر زور دیتا ہےوہ پرامن الیکشن انعقاد پر غور کرے۔

قرارداد میں کہنا تھا کہ امیدواروں کونشانہ بنانے کے بڑھتےواقعات میں اضافے پر گہری تشویش ہے۔

یاد رہے 5 جنوری کو سینیٹ میں 8 فروری کے عام انتخابات کو معطل کرنے کی قرارداد کثرت رائے سے منظور کر لی گئی تھی۔

سینیٹر دلاور خان نے الیکشن میں سازگار ماحول کی فراہمی کے لیے قرارداد پیش کی تھی ، جس میں کہا گیا تھا کہ بلوچستان اور خیبر پختونخوا میں صورتحال خراب ہے۔ مولانا فضل الرحمان اور محسن داوڑ پرحملے ہوئے ہیں جب کہ ایمل ولی خان اور دیگر سیاسی رہنماؤں کو تھریٹ ملے ہیں۔ الیکشن کے انعقاد کے لئے ساز گار ماحول فراہم کیا جانا چاہیے۔

قرارداد میں کہا تھا کہ خیبر پختونخوا، بلوچستان میں دہشتگردی کی کارروائیاں جاری ہیں جب کہ محکمہ صحت ایک بار پھر کورونا کے پھیلنے کا عندیہ دے رہا ہے

قرارداد میں مطالبہ کیا گیا تھا کہ چھوٹے صوبوں میں بالخصوص الیکشن مہم چلانے کیلیے مساوی حق دیا جائے اور الیکشن کمیشن شیڈول معطل کر کے سازگار ماحول کے بعد شیڈول جاری کرے۔