کراچی میں ڈکیتی مزاحمت پر ایک اور نوجوان قتل

کراچی : ڈکیتی مزاحمت پر فائرنگ سے 17 سالہ نوجوان جاں بحق ہوگیا، مقتول نوجوان نے ایک ملزم کو پکڑا تودوسرےملزم نے فائرنگ کردی۔

تفصیلات کے مطابق کراچی کے علاقے لانڈھی شیرپاؤ کالونی اسٹارگراؤنڈ کے قریب فائرنگ کا واقعہ پیش آیا، جس میں ڈاکووں نے مزاحمت پر نوجوان کو قتل کردیا۔

پولیس نے بتایا کہ مقتول نوجوان عباس گلی میں بیٹھ کر موبائل استعمال کر رہا تھا کہ 2 موٹر سائیکل سوار ملزمان نے مقتول سے موبائل چھیننے کی کوشش کی۔

پولیس کا کہنا تھا کہ نوجوان نے موبائل فون چھیننے پر مزاحمت کی، مقتول نوجوان نے ایک ملزم کو پکڑا تو دوسرے ملزم نے فائرنگ کر دی، فائرنگ سے نوجوان شدید زخمی ہوا جو بعد میں دم توڑ گیا۔

پولیس کے مطابق مقتول نوجوان گارمنٹس فیکٹری میں مشین آپریٹر تھا۔

خیال رہے کہ ایک رپورٹ کے مطابق رواں سال 100 سے زائد افراد اسٹریٹ کرائم کی وارداتوں کے دوران قتل ہوئے۔