شوبز انڈسٹری کی معروف ماڈل، اداکارہ و گلوکارہ عنزیلہ عباسی نے پاکستانی ڈراموں میں کام نہ کرنے کی وجہ بتادی۔
معروف اداکارہ جویریہ عباسی اور اداکار شمعون عباسی کی بیٹی عنزیلہ عباسی نے حال ہی میں ایک ٹاک شو میں شرکت کی اور شوبز کیریئر کے حوالے سے اظہار خیال کیا۔
انہوں نے کہا کہ پاکستانی ڈراموں میں زیادہ تر خواتین کو نیچا اور کمزور دکھایا جاتا ہے وہ ایسی نہیں ہیں، ڈرامے ساس بہو کی لڑائیوں پر مبنی ہوتے ہیں، یہ کہانیاں انہیں پسند نہیں اور وہ ان کہانیوں سے بالکل مختلف لڑکی ہیں اسی لیے وہ ڈراموں میں کام کرنے کی ہامی نہیں بھرتیں۔
عنزیلہ عباسی نے کہا کہ پاکستانی ڈرامے ان کے فن اور ہنر کے مطابق نہیں بنتے، ایسے ڈرامے ان کی اداکارانہ صلاحیتوں پر پورا نہیں اترتے۔
انہوں نے بتایا کہ تعلیم بیرون ملک سے حاصل کی اسی وجہ سے ان کے بات کرنے کا انداز اور طرز زندگی بہت مختلف ہے۔
عنزیلہ عباسی نے کہا کہ انہیں میوزک سے بہت لگاؤ ہے، اگر وہ کوئی خالص اپنی طرز کا گانا بناتی ہیں اور اس گانے کو صرف دو لوگ ہی پسند کرتے ہیں تو ان کے خیال میں یہ ان کی کامیابی ہے۔