سابق فاسٹ بولر عاقب جاوید نے کہا ہے کہ موجودہ بھارتی ٹیم گنگولی یا دھونی والی ٹیم نہیں جس میں کئی میچ ونر کھلاڑی ہوتے تھے۔
اے آر وائی نیوز کے مطابق پاکستان کے سابق فاسٹ بولر عاقب جاوید نے لاہور میں ایک تقریب سے خطاب رواں سال بھارت میں ہونے والے ورلڈ کپ اور پاک بھارت ٹاکرے سے متعلق بھی بات کی۔
عاقب جاوید نے کہا کہ بھارت کی کنڈیشنز میں پاکستان ٹیم جیسا کمبینیشن کسی کے پاس نہیں، شاہین آفریدی، فخر زمان، بابر اعظم جیسے اسٹار کھلاڑی کسی بھی وقت کسی بھی ٹیم کے خلاف کھیل کا نقشہ پلٹنے کی اہلیت رکھتے ہیں جب کہ آج کی بھارتی ٹیم گنگولی یا دھونی کے دور والی ٹیم نہیں ہے جس میں کئی میچ ونر کھلاڑی ہوتے تھے۔
سابق فاسٹ بولر نے کہا کہ ورلڈ کپ کے پاک بھارت ٹاکرے میں پاکستان فیورٹ ہے جب کہ میں ورلڈ کپ جیتنے کے لیے بھی پاکستان کو فیورٹ ٹیم تصور کرتا ہوں کیونکہ ہمارے پاس کئی میچ ونر کھلاڑی ہیں۔ موجودہ پاکستانی ٹیم بہت اچھی ہے اور اس کا کریڈٹ پی ایس ایل کو جاتا ہے۔
سابق ٹیسٹ کرکٹر نے یہ بھی کہا کہ آج انٹرنیشنل کرکٹ کونسل (آئی سی سی) کا مطلب بھارت ہے۔ یہ صرف پیسے کا گیم ہے اور ہمارے پاس بھارت جاکر کھیلنے کے علاوہ کوئی آپشن نہیں۔
ان کا کہنا تھا کہ کرکٹ بورڈ کی چیئرمین شپ کا کرکٹر سے کوئی تعلق نہیں، کرکٹر کو سلیکٹر ہونا چاہیے یا کوچنگ اسٹاف میں ہونا چاہیے، ہم انفرادیت پر چل رہے ہیں جس کی وجہ سے کرکٹ بورڈ میں مشکلات ہیں۔