پیرس اولمپکس میں ریکارڈ قائم اور پاکستان کی تاریخ کا پہلا انفرادی گولڈ میڈل جیتنے والے جیولن قومی ہیرو ارشد ندیم پر انعامات کی برسات ہوگئی ہے۔
پیرس اولمپکس میں پاکستانی جیولن تھروور ارشد ندیم نے فائنل میں اولمپکس کا 118 سالہ ریکارڈ توڑتے ہوئے طویل ترین تھرو کی اور گولڈ میڈل حاصل جو ملک کی 77 سالہ تاریخ میں انفرادی حیثیت میں پہلا گولڈ میڈل ہے۔
ارشد ندیم کی اس تاریخی کامیابی پر پوری قوم نہال اور شہر شہر، قصبے اور دیہات میں جشن منایا جا رہا ہے۔ ایسے میں حکومتوں، اداروں اور شخصیات کی جانب سے جیولن تھروور قومی ہیرو ارشد ندیم کے لیے انعامات کا اعلان کیا گیا ہے۔
سندھ حکومت نے ارشد ندیم کے لیے پانچ کروڑ روپے انعام کا اعلان کیا ہے۔ گورنر سندھ کامران ٹیسوری نے بھی ارشد ندیم کو مبارکباد دیتے ہوئے 10 لاکھ روپے نقد انعام دینے کا اعلان کیا ہے۔
ان کے علاوہ اے آر وائی نیٹ ورک کے سربراہ سلمان اقبال نے بھی ارشد ندیم کو گولڈ میڈل جیتنے پر مبارکباد دیتے ہوئے اے آر وائی لگونا میں اپارٹمنٹ تحفے میں دینے کا اعلان کیا ہے۔
آئی سی سی آئی کے صدر احسن بختاروی نے بھی ارشد ندیم کیلیے 10 لاکھ روپے نقد انعام کا اعلان کیا ہے۔ اس کے علاوہ میئر سکھر ارسلان شیخ نے جیولن قومی ہیرو کے لیے سونے کے تاج اور شہر میں زیر تعمیر نیو اسپورٹس اسٹیڈیم کو ارشد ندیم کے نام سے منسوب کرنے کا اعلان کیا ہے۔
https://urdu.arynews.tv/arshad-first-athlete-pakistan-history-win-individual-gold/