پاکستان تحریک انصاف کے مرکزی رہنما اور سابق اسپیکر قومی اسمبلی اسد قیصر کا کہنا ہے کہ غیر منتخب شخص نے عوام کے منتخب نمائندوں کے وزیر اعلیٰ کو ڈی نوٹیفائی کیا۔
صوابی کے علاقے ٹوپی میں جلسے سے خطاب میں اسد قیصر نے کہا کہ عمران خان کی سیاست ملک میں انصاف پر مبنی میریٹ کے نظام کے لیے ہے، ہماری جدوجہد خود مختار پاکستان کے لیے ہے جس کے فیصلے باہر سے نہیں ہوں گے۔
اسد قیصر نے کہا: ’ہماری حکومت ختم کی گئی اور موجودہ حکومت چوں چوں کا مربہ ہے۔ ان کے پاس پارلیمان میں اعدادی اکثریت نہیں۔ ان سے ملک نہیں چل رہا۔ 7 لاکھ سے زائد نوجوان بیرون ملک جا چکے۔ مہنگائی اور بے روزگاری عروج پر ہے۔‘
’پنجاب میں جس طرح آئین و قانون کا مذاق اڑایا گیا اسکی مثال نہیں ملتی۔ ملک کو لاقانونیت اور انارکی کے طرف لے کر جایا جا رہا ہے۔ عدالتوں کو آئین اور قانون کی بالادستی کے لیے اقدامات اٹھانے چاہئیں۔ ملک میں انسانی حقوق کی خلاف ورزیوں کا تماشہ لگا ہے۔ اعظم سواتی اور شہباز گل کے ساتھ جو ہوا وہ شرمناک ہے۔‘
انہوں نے کہا کہ وفاقی وزرا اور رانا ثنا اللہ نے تو کہا تھا کہ اسمبلیاں تحلیل کریں ہم الیکشن میں جائیں گے، ہم نے خیبر پختونخوا اور پنجاب اسمبلی کی تحلیل کا فیصلہ کیا مگر پی ڈی ایم بھاگ گئی، پی ڈی ایم کی الیکشن سے بھاگنے کی وجہ شکست کا ڈر ہے۔