بھارتی ٹیم پاکستان نہ آئے تو کیا کرنا چاہیے؟ شاہد آفریدی نے بتادیا

قومی ٹیم کے سابق کپتان شاہد آفریدی نے ایشیا کپ 2023 میں بھارتی ٹیم کے پاکستان نہ آنے پر بورڈ کو ایشین کرکٹ کونسل سے الگ ہونے کا مشورہ دے دیا۔

بھارتی میڈیا سے گفتگو کرتے ہوئے شاہد آفریدی نے کہا کہ جے شاہ بیان پر آئی سی سی کا کردار بھی اہم ہے اگر بھارت پاکستان میں ایشیا کپ کھیلنے نہیں آتا تو پاکستان کے پاس ایشین کرکٹ کونسل سے باہر جانے کا آپشن ہے۔

انہوں نے کہا کہ اگر ہماری باتیں ہی نہیں سنی جانیں تو پھر ہمیں الگ ہوجانا چاہیے۔

شاہد آفریدی نے کہا کہ یہاں بی سی سی آئی نے بچکانہ حرکت کی ہے ،تھوڑا وقت لے لیتے کوئی بات نہیں، اگر آپ نے فیصلہ یہی لینا تھا تو پاکستان اور بھارت کے ورلڈکپ سے قبل ایسا بیان میرے خیال سے جلد بازی ہے۔

واضح رہے کہ بھارتی کرکٹ بورڈ نے ایشیا کپ 2023 کے لیے  پاکستان آنے سے انکار کردیا ہے جس کے جواب میں پاکستان نے بھارت میں ہونے والے ورلڈکپ کے بائیکاٹ کی دھمکی دی ہے۔

اس سے قبل ہربھجن سنگھ نے بھی بھارتی ٹیم کے پاکستان نہ آنے کے فیصلے کو درست قرار دیا تھا ان کا کہنا تھا کہ بھارت پاکستان سے آئی سی سی ایونٹس میں ہی کھیلے گا۔

ان کا کہنا تھا کہ ہماری حکومت اس لیے اجازت نہیں دیتی کہ پاکستان میں سیکیورٹی تھریٹس ہیں جب ان سے یہ کہا گیا کہ دیگر بڑی ٹیمیں پاکستان آکر گئی ہیں تو وہ آئیں بائیں شائیں کرنے لگے۔