اسلام آباد: سابق صدر و پیپلزپارٹی کے شریک چیئرمین آصف زرداری کا کہنا ہے کہ اداروں کو بدنام کرنے کی کوشش نے ایک شخص کو بے نقاب کردیا۔
اے آر وائی نیوز کے مطابق سابق صدر آصف زرداری کا کہنا ہے کہ ایک شخص اداروں کو بدنام کرنے کی ہر حد عبور کرچکا ہے اب مزید برداشت نہیں کیا جائے گا۔
انہوں نے کہا کہ بس بہت ہوگیا اب کوئی اس کی پیروی کرنے کا سوچ بھی نہیں سکتا، غیرملکی ایجنٹ کی گزشتہ روز تقریر کے بعد کوئی محب وطن اس کی پیروی کا سوچ بھی نہیں سکتا ہے۔
آصف زرداری نے کہا کہ ایک شخص میرے آباؤ اجداد، بچوں، ملک کو تباہ کرنے کے درپے ہے اسے ملک تباہ کرنے کی ہم اجازت نہیں دیں گے۔
سابق صدر نے کہا کہ اس شخص کو ہماری اقدار، ملک سے کھلواڑ کی اجازت نہیں دیں گے، یہ وہ ملک ہے جہاں ہم سب نے دفن ہونا ہے۔
انہوں نے کہا کہ آرمی کے بہادر افسران کے ساتھ پورا پاکستان کھڑا ہے ان پر الزامات دراصل ادارے پر حملہ ہیں۔
آصف زرداری نے مزید کہا کہ ایک شخص جھوٹ سے معصوم کارکنان کو بے وقوف بنا رہا ہے میں اس کا زوال دیکھ رہا ہوں۔