عاصم اظہر کو یوٹیوب کا گولڈن بٹن مل گیا

معروف پاکستانی گلوکار عاصم اظہر کو یوٹیوب کی جانب سے گولڈن بٹن دے دیا گیا ہے۔

گلوکار عاصم اظہر کے ویڈیو شیئرنگ پلیٹ فارم یوٹیوب پر 1.11 ملین سبسکرائبرز ہیں جس کے بعد انہیں مقبول ترین سرچ انجن گوگل کی ملکیتی ویڈیو سائٹ یوٹیوب کی جانب سے گولڈن بٹن دیا گیا ہے۔

عاصم اظہر نے یہ خوشخبری مداحوں کو انسٹاگرام اسٹوری کے ذریعے دی۔ گلوکار نے تصویر شیئر کی جس میں ان کی والدہ و اداکارہ گل رعنا یوٹیوب گولڈن بٹن تھامے مسکرا رہی ہیں۔

انہوں نے اس پوسٹ میں شکر ادا کرتے ہوئے لکھا کہ ’یہ ہفتہ ان کے لیے بہت حیران کُن رہا ہے۔‘

واضح رہے کہ گولڈن پلے بٹن یوٹیوب کی جانب سے دس لاکھ سے زائد سبسکرائبرز رکھنے والے یوٹیوب چینلز کو دیا جاتا ہے، یہ یوٹیوب کی جانب سے ایک اعزاز ہوتا ہے۔

یہ بٹن پانے والے چینلز مالکان کو یوٹیوب کے چیف ایگزیکٹو کا دستخط شدہ خط بھی دیا جاتا ہے جس میں ان کی کارکردگی کو سراہا گیا ہوتا ہے۔