ورلڈ کپ کے 24ویں میچ میں آسٹریلیا اور نیدرلینڈز کی ٹیمیں مدمقابل ہیں اس دوران آسٹریلوی ٹیم بازو پر سیاہ پٹی باندھ کر میچ کھیل رہی ہیں۔
ورلڈ کپ میں آسٹریلیا کی ٹیم نے دو میچز میں کامیابی حاصل کی ہے اور پوائنٹس ٹیبل پر اس کے چار پوائنٹس ہیں جبکہ نیدرلینڈز نے ایک میچ جیت کر دو پوائنٹس حاصل کررکھے ہیں۔
آج کے میچ میں آسٹریلوی ٹیم بازو پر سیاہ پٹی باندھے میدان میں اتری جس کی وجہ سامنے آگئی ہے۔
گزشتہ ہفتے پاکستانی نژاد آسٹریلوی کرکٹر فواد احمد کے چار ماہ کے بچے کا انتقال ہوگیا۔
فواد احمد کے ہاں رواں سال جون میں دوسرے بچے کی پیدائش ہوئی تھی تاہم نوزائیدہ بچے کو صحت کے کئی مسائل کا سامنا تھا اور اسے میلبرن کے رائل چلڈرن اسپتال میں داخل کرایا گیا جہاں وہ اپنی بیماری کے باعث دم توڑ گیا۔
آسٹریلوی کھلاڑیوں نے نیدر لینڈز کے خلاف میچ میں سابق کرکٹر فواد احمد اور ان کے خاندان کے ساتھ افسوس کا اظہار کرنے کے لیے اپنے بازو پر سیاہ پٹی باندھی۔
واضح رہے کہ فواد احمد نے آسٹریلیا کی جانب سے 3 ون ڈے اور 2 ٹی ٹوئنٹی میچز کھیلے ہیں۔
فواد احمد پاکستانی کرکٹرز جنید خان اور یاسر شاہ کے کزن بھی ہیں۔