Author: عبدالقادر

اسلام آباد: پاکستان تحریک انصاف (پی ٹی آئی) نے مخصوص نشستوں کے فیصلے کے بعد قومی اسمبلی سے استعفوں کا امکان مسترد کر دیا۔

پی ٹی آئی رہنما ملک عامر ڈوگر نے اپنے بیان میں کہا کہ ماضی میں اسمبلیوں سے نکلنا ہماری بڑی غلطی تھی جس کا آج تک خمیازہ بھگت رہے ہیں، دو صوبائی اسمبلیاں توڑنا ہماری بہت بڑی غلطی ثابت ہوا۔

ملک عامر ڈوگر نے کہا کہ ہم اسی اسمبلی کے میدان سے اپنی جدوجہد جاری رکھیں گے، 85 ارکان کے بدلے مخصوص نشستوں کو مال غنیمت کے طور پر دے دیا گیا۔

یہ بھی پڑھیں: سیاسی جماعتوں نے پی ٹی آئی ارکان اسمبلی کو ساتھ ملانے کی کوششیں تیز کر دیں

انہوں نے کہا کہ جن کے پاس 17 سیٹیں تھیں انہیں دو تہائی اکثریت دے دی گئی، سیاسی جماعتیں کس منہ سے ان مخصوص نشستوں پر اپنے ارکان بٹھائیں گے۔

ملک عامر ڈوگر سے صحافی نے سوال کیا کہ آپ کی پارٹی کے آزاد لوگ کسی اور جماعت میں جا سکتے ہیں کیا ان پر دباؤ ہے؟

اس پر ان کا کہنا تھا کہ جو جانے والے تھے وہ پنچھی بھاری قیمت کے عوض اُڑ گئے، اب کوئی ایم این اے یا ایم پی اے چھوڑ کر نہیں جائے گا۔

انہوں نے کہا کہ 85 ارکان باقی رہ گئے ہیں ان کے حلف نامے بھی چیک کرنے کا کہا گیا ہے، ایسا ظلم دنیا کی کسی پارلیمنٹ میں نہیں ہو رہا جو پی ٹی آئی کے ساتھ ہو رہا ہے۔

سپریم کورٹ کے آئینی بینچ کا فیصلہ

سپریم کورٹ کے آئینی بینچ نے مخصوص نشستوں سے متعلق کیس کا فیصلہ سنا دیا اور عدالت عظمیٰ کا گزشتہ سال 12 جولائی کا فیصلہ کالعدم قرار دیتے ہوئے پشاور ہائیکورٹ کا فیصلہ بحال کیا۔

فیصلے کے بعد سنی اتحاد کونسل (پاکستان تحریک انصاف) مخصوص نشستیں سے محروم ہوگئی۔ اس کے کوٹے کی نشستیں مسلم لیگ (ن) اور پاکستان پیپلز پارٹی سمیت قومی اسمبلی میں موجود دیگر جماعتوں کو ملیں گی۔

کیس کے فیصلے پر پی ٹی آئی نے ردعمل دیتے ہوئے کہا کہ آج ایک بار پھر ہمارے آئینی حق پر ڈاکا ڈال دیا گیا، سپریم کورٹ کے گزشتہ سال 12 جولائی کے فیصلے کے تحت مخصوص نشستوں کا آئینی استحقاق تسلیم کیا گیا تھا، یہ وہ وقت تھا جب عدالت نے آئین کی روشنی میں فیصلہ دیا تھا جب کہ آج ایک ایسا فیصلہ آیا ہے جس نے انصاف کی روح کو کچلا ہے۔

پی ٹی آئی نے کہا کہ آج کے فیصلے میں پی ٹی آئی کی مخصوص نشستوں کو چھین کر مال غنیمت کی طرح بانٹا گیا ہے، پہلے بلے کا نشان چھینا گیا اور اب مخصوص نشستوں کا حق بھی چھین لیا گیا، ہم پر ہر دروازہ بند کر دیا گیا مگر ہمارے دل اور زبان پر تالے نہیں لگائے جا سکتے۔

ردعمل مین کہا گیا کہ ہم انصاف کے نظام سے ناامید ہو چکے ہیں لیکن عوام سے نہیں، ہماری آج بھی ایک امید باقی ہے اور وہ بانی پی ٹی آئی عمران خان ہیں۔

اسلام آباد: اپوزیشن لیڈر عمر ایوب نے اسپیکر قومی اسمبلی ایاز صادق سے اپنے خلاف نااہلی ریفرنس اور فیصلے کی تفصیلات مانگ لیں۔

عمر ایوب نے ایاز صادق کو خط لکھا جس میں انہوں نے مطالبہ کیا کہ نااہلی ریفرنس کی قانونی و آئینی بنیاد، مصدقہ نقل اور کارروائی کا ریکارڈ فراہم کریں جبکہ ریفرنس کی مکمل مصدقہ کاپی اور شواہد مہیا کیے جائیں۔

اپوزیشن لیڈر نے اسپیکر قومی اسمبلی سے نااہلی ریفرنس پر فیصلہ کے دوران کی اندرونی کارروائی اور فائل نوٹنگز مانگیں۔ انہوں نے لکھا کہ نوٹسز اور وضاحت کا موقع فراہم کرنے کی تفصیل فراہم کی جائے۔

یہ بھی پڑھیں: عمر ایوب کیخلاف نااہلی کا کیس سماعت کیلیے مقرر

رہنما پی ٹی آئی کی طرف سے تیسرے فریق کی درخواستوں کی بنیاد پر ریفرنس پر وضاحت مانگی گئی۔ عمر ایوب نے کہا کہ آرٹیکل 63 (2) کے تحت اسپیکر قومی اسمبلی کی صوابدیدی نظیریں بھی دی جائیں، قانونی عمل، شفافیت اور منصفانہ کارروائی کیلیے تفصیلات دیں۔

یاد رہے کہ مسلم لیگ (ن) کے رہنما بابر نواز نے اپوزیشن لیڈر کے خلاف نااہلی ریفرنس دائر کیا تھا جبکہ اسپیکر قومی اسمبلی ایاز صادق نے ریفرنس مزید کارروائی کیلیے الیکشن کمیشن بھجوایا تھا۔

عمر ایوب کا کہنا ہے کہ ایاز صادق نے بغیر کسی تحقیق کے میرے خلاف ریفرنس الیکشن کمیشن بھجوایا، وہ مجھے آگاہ کر لیتے کہ آپ کے خلاف درخواست ہے۔

رہنما پی ٹی آئی نے کہا کہ میرے مدمقابل ایبٹ آباد ہائیکورٹ بھی گئے ان کا مؤقف مسترد کیا گیا، اسپیکر نے بدنیتی کی بنیاد پر ریفرنس الیکشن کمیشن بھجوایا، میرے خلاف اس کیس کی بنیاد ہی کمزور ہے۔

اسلام آباد: پاکستان تحریک انصاف (پی ٹی آئی) کی مذاکراتی کمیٹی کو تاحال اڈیالہ جیل میں قید اپنے بانی عمران خان سے ملاقات کیلیے گرین سگنل نہ مل سکا۔

پی ٹی آئی کی مذاکراتی کمیٹی کے ترجمان صاحبزادہ حامد رضا نے اے آر وائی نیوز سے گفتگو میں کہا کہ حکومت کی جانب سے تاحال عمران خان سے ملاقات سے متعلق آگاہ نہیں کیا گیا، کمیٹی ان سے ملاقات میں تحریری مطالبات پر مشاورت کرے گی۔

یہ بھی پڑھیں: 190 ملین پاؤنڈ کیس کا فیصلہ خلاف آتا ہے تو اثرات مذاکرات پر پڑیں گے، حامد رضا

یاد رہے کہ حکومتی کمیٹی نے پی ٹی آئی کو عمران خان سے ملاقات کا اہتمام کروانے کی یقین دہانی کروائی تھی۔

دوسری جانب، عمران خان کی لیگل ٹیم کے ممبر خالد یوسف چوہدری نے اپنے بیان میں کہا کہ عدالت نے 190 ملین پاؤنڈ کیس کے فیصلے کیلیے 6 جنوری 2025 کی تاریخ مقرر کر رکھی ہے، یہ ہمارے خلاف کیس ہے لیکن ابھی تک بتایا نہیں گیا کہ فیصلے کی تاریخ تبدیل ہو چکی ہے۔

خالد یوسف نے کہا کہ عدالتی عملے سے رابطہ کیا تو انہوں نے بھی نہیں بتایا گیا کہ تاریخ تبدیل ہو چکی ہے، سوشل میڈیا پر ہم دیکھ رہے ہیں شاید فیصلہ سنانے کی تاریخ تبدیل کر دی گئی ہے۔

انہوں نے کہا کہ سوشل میڈیا پر یہ بھی چل رہا ہے کہ 10 سے 12 دن بعد فیصلہ آئے گا۔

گزشتہ روز صاحبزادہ حامد رضا نے اے آر وائی نیوز کے پروگرام ’اعتراض ہے‘ میں کہا تھا کہ اگر 190 ملین پاؤنڈ کیس کا فیصلہ خلاف آتا ہے تو ظاہر ہے اثرات مذاکرات پر پڑیں گے۔

صاحبزادہ حامد رضا نے کہا تھا کہ عمران خان ہماری جماعت کے قائد ہیں ان سے مشاورت کے بغیر ہم آگے نہیں بڑھ سکتے لیکن ان سے مشاورت کیلیے ہمیں وقت درکار ہے، حکومت سے مطالبہ کیا عمران خان سے تفصیلی مشاورت کرنے دیں۔

انہوں نے واضح کیا کہ مسکرانے کی بات اس لیے کی ہے کہ عمران خان جلد باہر آ رہے ہیں، ان کی رہائی پاکستان کے قانون کے مطابق ہوگی، وہ خود بھی واضح کہہ چکے ہیں کہ بیرونی مداخلت قبول نہیں کریں گے۔

’آئین و قانون کے مطابق فیصلہ ہوگا تو 190 ملین پاؤنڈ کیس میں کچھ بھی نہیں، اگر کیس کا فیصلہ خلاف آتا ہے تو ظاہر ہے اثرات مذاکرات پر پڑیں گے۔‘