Author: عبدالقادر

چیئرمین پاکستان تحریک انصاف اور سابق وزیر اعظم عمران خان نے چیف الیکشن کمشنر سکندر سلطان کے خلاف جوڈیشل ریفرنس دائر کرنے کا فیصلہ کرلیا۔

عمران خان کی زیرِ صدارت پارٹی قیادت کا اہم اجلاس ہوا جس میں الیکشن کمیشن ارکان کی حکومتی وفد سے ملاقات پر شدید تشویش کا اظہار کیا گیا۔

پی ٹی آئی قیادت نے کہا کہ چیف الیکشن کمشنر سکندر سلطان کی جانب سے کوڈ آف کنڈکٹ کی دھجیاں اڑائی گئیں۔

اجلاس میں چیئرمین کی جانب سے چیف الیکشن کمشنر کے خلاف جوڈیشل ریفرنس دائر کرنے کا فیصلہ کیا گیا۔ اجلاس میں الیکشن کمیشن کے خلاف صوبائی حکومتوں میں بھی کارروائی کا اعلان کیا گیا۔

دو صوبائی اسمبلیاں الیکشن کمیشن کے خلاف عدم اعتماد کی قرارداد لائیں گی۔ عمران خان نے قانونی ماہرین کو کارروائی شروع کرنے کی منظوری دے دی۔

اس سے قبل اسلام آباد میں رہنما تحریک انصاف فواد چوہدری نے پریس کانفرنس میں کہا کہ الیکشن کمیشن کی حکمران اتحاد کے رہنماؤں سے ملاقات ہوئی جس میں پی ٹی آئی فنڈنگ کیس کو زیر بحث لایا گیا۔

فواد چوہدری نے کہا ”چیف الیکشن کمشنر ہائی کورٹ کے جج کے برابر تنخواہ لیتے ہیں اور ججز کا کوڈ آف کنڈکٹ الیکشن کمیشن ارکان پر بھی لاگو ہوتا ہے، کیس کے دوران جج کسی فریق سے نہیں مل سکتا تو کس طرح الیکشن کمیشن کے ممبران پینڈنگ کیس پر مخالف پارٹی سے ملاقات کرسکتے ہیں؟“

انہوں نے کہا کہ چیف الیکشن کمشنر اور ارکان نے ملاقات کر کے عدلیہ کے کوڈ آف کنڈکٹ کی سنگین خلاف ورزی کی ہے، پینڈنگ کیس کے دوران ملاقاتیں نہیں کی جاسکتیں یہ اخلاقی اصول ہے، کمیشن نے ملاقات میں یقین دہانی کرائی کہ کیس کا فیصلہ ہوگا، ہم اپنی قانونی ٹیم سے جوڈیشل کمیشن میں ریفرنس بھیجنے پر بات کر رہے ہیں، کمیشن ارکان کے خلاف ریفرنس بھیج کر انہیں نوکری سے برخاست کیا جائے۔

اسلام آباد: پاکستان تحریک انصاف نے پنجاب میں وزیراعلیٰ کے انتخاب کے دوران دھاندلی کے سرکاری اعلان پر پی ٹی آئی نے سپریم کورٹ سے رجوع کرلیا۔

اے آر وائی نیوز کی رپورٹ کے مطابق پنجاب میں وزیراعلیٰ پنجاب کے الیکشن کو شفاف بنانے کیلئے پی ٹی آئی نے سپریم کورٹ سے رجوع کرلیا ہے، پی ٹی آئی نے پنجاب میں دھاندلی کے سرکاری اعلان پر سپریم کورٹ میں توہین عدالت کی درخواست دائر کی ہے۔

درخواست میں پی ٹی آئی نے موقف اختیار کیا ہے کہ یکم جولائی کے فیصلے میں سپریم کورٹ فل بینچ نے شفاف الیکشن کا حکم جاری کیا، لیکن وزرا عدالتی احکامات کی تعمیل میں رکاوٹ پیدا کررہے ہیں، مشکوک عبوری وزیراعلیٰ بھی دھاندلی کے لئے بیٹھا ہے۔

پی ٹی آئی نے درخواست میں سپریم کورٹ سے یکم جولائی کے فیصلے پر مکمل عملدرآمد، دھاندلی روکنے اور اس کے سدباب کا حکم جاری کرنے کی استدعا کی ہے۔

تحریک انصاف نے حکومتی وزرا کے خلاف سپریم کورٹ سے توہین عدالت کی درخواست کل سماعت کیلئے مقرر کرنے کی درخواست کی ہے۔

خیال رہے کہ گزشتہ روز پریس کانفرنس کرتے ہوئے وفاقی وزیر داخلہ رانا ثنا اللہ کا کہنا تھا کہ 22 جولائی کو چوہدری پرویز الٰہی کو آسانی سے وزیر اعلیٰ پنجاب نہیں بننے دیں گے، اگر لیڈرشپ کی طرف سے منظوری مل جائے تو تحریک انصاف کے 5 سے 7 ارکان اِدھر اُدھر ہوجانا کوئی بڑی بات نہیں بلکہ ہوسکتا ہے اس سے زیادہ لوگ ادھر ادھر ہونے کا بھی ارادہ رکھتے ہوں۔

انتخابی فہرستوں میں ووٹوں کی مبینہ ردوبدل کے معاملے پر پاکستان تحریک انصاف نے الیکشن کمیشن کیخلاف ویڈیو ثبوت منظر عام پر لے آئی ہے۔

اے آر وائی نیوز کے مطابق انتخابی فہرستوں میں ووٹوں کی مبینہ ردوبدل کے معاملے پر پاکستان تحریک انصاف نے الیکشن کمیشن کیخلاف ویڈیو ثبوت منظر عام پر لے آئی ہے۔ اس حوالے سے پی ٹی آئی کا دعویٰ ہے کہ الیکشن کمیشن کا عملہ دھاندلی کی کوشش کرتے ہوئے رنگے ہاتھوں پکڑا گیا ہے اور سیالکوٹ میں ووٹر لسٹوں میں ہیرا پھیری کی مبینہ کوشش کے ثبوت مل گئے ہیں۔

پی ٹی آئی رہنما عثمان ڈار نے اس حوالے سے سماجی رابطوں کی ویب سائٹ ٹوئٹر پر یہ دعویٰ کیا ہے کہ ن لیگی رہنما اور وزیر دفاع خواجہ آصف کے حلقے میں دھاندلی کی کوشش پکڑی گئی ہے جہاں الیکشن کمیشن کا عملہ ن لیگ سے مل کر دھاندلی کی منصوبہ بندی کرتا پکڑا گیا ہے، انہوں نے اس مبینہ دھاندلی کی کوشش کی فوٹیجز بھی جاری کردی ہیں۔

عثمان ڈار کا اپنے ٹوئٹس میں کہنا ہے کہ الیکشن کمیشن ہمارے کارکنان کے ووٹ ایک سے دوسری جگہ منتقل کرتا پکڑا گیا، ووٹر لسٹوں میں فوت ظاہر کئے گئے افراد زندہ نکل آئے، عمران خان نے الیکشن کمیشن اور ن لیگ گٹھ جوڑ پر پہلے ہی خدشات کا اظہار کیا تھا۔

ان کا کہنا تھا کہ سیالکوٹ کینٹ میں الیکشن کمیشن عملے کو 3 لیگی اراکین کیساتھ رنگے ہاتھوں پکڑا، جہاں الیکشن کمیشن کا عملہ پی ٹی آئی کے ووٹ بغیر تصدیق شفٹ کر رہا تھا اور عملہ شناختی کارڈ کی کاپیاں لگائے بغیر خود دستخط کر رہا تھا۔

پی ٹی آئی رہنما نے ٹوئٹ میں بتایا کہ خواجہ آصف کواسی حلقے میں 2018 کا الیکشن ہرا چکے ہیں، الیکشن کی رات خواجہ آصف نے کس کو ٹیلی فون کیا تھا پوری قوم جانتی ہے، اب یہی خواجہ آصف الیکشن کمیشن عملے سے مل کر منظم دھاندلی کا منصوبہ بنا رہے ہیں، معاملے پر عمران خان کو اعتماد میں لیا ہے اور عدالت جانے کا فیصلہ کیا ہے۔

معاملے سے پارٹی چیئرمین عمران خان کو آگاہ کر دیا گیا ہے،خواجہ آصف اسی حلقے میں 2018 کا الیکشن چرا چکے ہیں، اب ایک بار پھر الیکشن کمیشن کے عملے سے مل کر منظم دھاندلی کا منصوبہ بنایا گیا ہے جس کے ویڈیو ثبوت نہ صرف قوم کے سامنے رکھنے کا فیصلہ ہوا ہے بلکہ عدالت سے بھی رجوع کرینگے
2/2 pic.twitter.com/Tq8vzuDPcd

— Usman Dar (@UdarOfficial) June 28, 2022

عثمان ڈار نے مزید کہا کہ الیکشن کمیشن نے لیگ کا ونگ بن کر منظم دھاندلی کا منصوبہ بنایا ہے اور چیف الیکشن کمشنر ن لیگ کے سہولت کار بنے ہوئے ہیں، خدشہ ہے کہ پنجاب کے ضمنی انتخاب میں بھی دھاندلی کرائی جائیگی۔

پی ٹی آئی رہنما نے اپنے ٹوئٹ میں پرزور مطالبہ کیا ہے کہ منتقل کئے گئے ووٹوں کی بائیو میٹرک تصدیق کرائی جائے۔