Author: عبدالقادر

اسلام آباد: پاکستان تحریک انصاف (پی ٹی آئی) کی اعلیٰ قیادت نے بانی کی جانب سے ڈی چوک پر احتجاج کی کال دیے جانے کی تردید کر دی۔

پی ٹی آئی کی اعلیٰ قیادت نے اہم تفصیلات بتاتے ہوئے انکشاف کیا ہے کہ بانی نے ڈی چوک پر احتجاج کی کال نہیں دی تھی بلکہ انہوں نے صرف اسلام آباد کی کال دی تھی اور مقام کا تعین وہاں پہنچ کر کرنا تھا، ان سے ابتدائی ملاقات میں اہم فریق کی جانب سے بات چیت سے آگاہ کیا گیا تھا۔

یہ بھی پڑھیں: بانی پی ٹی آئی نے ڈی چوک جانے کی ہدایت دی تھی یا نہیں؟ علی محمد خان کی مبینہ آڈیو لیک

اعلیٰ قیادت نے بتایا کہ بانی نے مارچ اور بات چیت ایک ساتھ جاری رکھنے کی ہدایت کی تھی، ان کو آگاہ کیا گیا تھا اعلیٰ سطح رابطہ استوار ہو چکا ہے اور بات چیت آگے بڑھانی چاہیے، بانی نے علی امین گنڈاپور، عمر ایوب اور شبلی فراز کو بات چیت کا اختیار دیا تھا۔

’بشریٰ بی بی کی مارچ میں شرکت کا فیصلہ پی ٹی آئی قیادت کیلیے حیران کن تھا۔ قیادت آخری وقت تک بشریٰ بی بی کے مارچ میں شرکت کے فیصلے سے لا علم تھی۔ بانی کو دوسری ملاقات میں ان کی اہلیہ کے فیصلے سے آگاہ کیا گیا تھا جس پر اُن کا کہنا تھا کہ یہ بشریٰ بی بی کا فیصلہ ہے وہ چاہیں تو شرکت کر سکتی ہیں۔‘

اعلیٰ قیادت نے انکشاف کیا کہ بیرسٹر سیف کو چارٹرڈ طیارے کے ذریعے پشاور سے لانے کی اطلاعات درست نہیں، وہ بانی سے ملاقات کیلیے راولپنڈی سے پہنچے تھے، بیرسٹر گوہر اور بیرسٹر سیف نے بات چیت کے دوران بانی سے سنگجانی کے مقام پر پڑاؤ کی اجازت مانگی تھی جس سے بانی نے اتفاق کیا تھا۔

’سنگجانی کے مقام پر پڑاؤ ڈالنے کے فیصلے پر بشریٰ بی بی کی رائے مختلف تھی۔ علی امین گنڈاپور نے بانی سے ویڈیو پیغام جاری کروانے کا مشورہ دیا تھا جس پر مشاورت ہوئی تھی تاہم دوسرے فریق کی جانب سے اتفاق نہ ہو سکا تھا۔ فریقین میں مارچ روکنے پر اتفاق نہ ہونے پر حکومت نے اقدامات شروع کیے تھے۔ موٹرویز بند کرنے اور رکاوٹیں لگانے پر ابتدائی بات چیت میں تعطل آگیا تھا۔‘

پاکستان تحریک انصاف (پی ٹی آئی) کے متعدد رہنماؤں نے بشریٰ بی بی کے بیان کو ذاتی رائے قرار دے دیا۔

اے آر وائی نیوز کے مطابق بانی پی ٹی آئی کی اہلیہ بشریٰ بی بی کے گزشتہ روز کے بیان پر رہنماؤں میں تشویش پائی جاتی ہے جس میں کہا گیا ہے کہ بشریٰ بی بی کا سیاست میں عمل دخل نہیں بیان کو پارٹی پالیسی قرار نہیں دیا جاسکتا۔

پارٹی ذرائع کے مطابق بانی پی ٹی آئی پارٹی پالیسی دینے کے اصل مجاز ہے۔

ذرائع کا یہ بھی کہنا ہے کہ بانی متعدد مرتبہ بشریٰ بی بی کی سیاست میں عمل دخل سے متعلق وضاحت کرچکے ہیں، بشریٰ بی بی کے بیان کو سیاق و سباق سے ہٹ کر پیش کیے جانے کو نظر انداز نہیں کیا جاسکتا۔

اس سے قبل وزیراعظم شہباز شریف نے کہا تھا کہ کل جو بیان آیا اس سے بڑی پاکستان کے ساتھ دشمنی نہیں ہو سکتی، سعودی عرب نے کبھی کوئی مطالبہ نہیں کیا ہمیشہ پاکستان کیلیے دروازے کھولے، آج سعودب عرب کے بادشاہ اور ولی عہد کھل کر پاکستان کی مدد کر رہے ہیں، دورے کے دوران سعودی ولی عہد محمد بن سلمان نے کہا کہ آپ منصوبے لے کر آئیں ہم تو انتظار کر رہے ہیں۔

ان کا کہنا تھا کہ یہ لوگ زہر آلود بیان دے رہے ہیں جس کے پاکستان کو نقصان کا ان کو اندازہ نہیں، جس دوست بھائی کا یہ رویہ ہو ان کے خلاف زہر اگلا جائے تو وہ کیا کہیں گے؟

واضح رہے کہ بانی نے حکومت گرانے کا الزام امریکا پر عائد کیا تھا جبکہ بشریٰ بی بی کسی اور پر یہ الزام لگادیا۔

بشریٰ بی بی کا کہنا تھا کہ بانی پی ٹی آئی جب مدینہ ننگے پاؤں گئے اور واپس آئے تو باجوہ کو فون کالز آنا شروع ہوگئی تھیں۔

بشریٰ بی بی کے مطابق باجوہ کو کہا گیا یہ آپ کس شخص کو لے آئے ہیں ہمیں ایسے لوگ نہیں چاہئیں، باجوہ کو کہا گیا ہم تو اس ملک میں شریعت ختم کرنے لگے ہیں اور آپ ایسے شخص کو لے آئے۔

بشریٰ بی بی کا کہنا تھا کہ کہا گیا ہمیں ایسے لوگ نہیں چاہیے تب سے ہمارے خلاف گند ڈالنا شروع کردیا گیا، میرے خلاف گند ڈالا گیا اور بانی کو یہودی ایجنٹ کہنا شروع کردیا گیا۔