Author: عبدالقادر

اسلام آباد: وزیراعظم عمران خان کا کہنا ہے کہ حکومت کی پوری توجہ مہنگائی میں کمی پر مرکوز ہے، فی الحال قومی مسائل اور چیلنجز پر مل کر قابو پانا ہے۔

تفصیلات کے مطابق وزیراعظم عمران خان کی زیر صدارت پارلیمانی پارٹی کا اجلاس ہوا جس میں عوامی مسائل کے فوری حل کے لیے نیشنل پالیسی پر مشاورت کی گئی۔ اجلاس میں کرونا وائرس کے مزید پھیلاو سے بچاؤ کے لیے تجاویز پر تبادلہ خیال کیا گیا۔

اجلاس میں تجویز دی گئی کہ بلوچستان سے منسلک بارڈر پر شدید خطرہ ہے، مکمل سیل کر دیا جائے۔ وزراء اور اراکین کی جانب سے اجلاس میں بجلی کی قیمتیوں میں اضافے اور سیکرٹری توانائی کے عدم تعاون کا معاملہ اٹھایا گیا۔ ارکان اسمبلی کا کہنا تھا کہ سیکرٹری توانائی بات نہیں سن رہے۔

وزیراعظم نے ارکان کی شکایات کا نوٹس لیتے ہوئے شکایات کو فوری حل کرنے کی یقین دہانی کرائی۔وزیراعظم نے صوبوں میں ترقیاتی منصوبے جلد مکمل کرنے کی بھی یقین دہانی کروائی۔

وزیراعظم عمران خان کا کہنا تھا کہ حکومت کی پوری توجہ مہنگائی میں کمی پر مرکوز ہے، فی الحال قومی مسائل اور چیلنجز پر مل کر قابو پانا ہے۔ انہوں نے کہا کہ حلقے کے ترقیاتی مسائل کا بھی علم ہے، جلد اسے حل کیا جائے گا۔

اجلاس سے خطاب کرتے ہوئے عمران خان نے کہا کہ ہم نے اقوام متحدہ ہیڈ کوارٹر میں بھارت کی اصلیت دنیا کو دکھائی تھی،کشمیر میں مزید 2 آرڈیننس آنے سے بھارت کا چہرہ پھر بےنقاب ہوگیا۔

وزیراعطم کا کہنا تھا کہ بھارت میں مسلمانوں پرظلم ہو رہا ہے،دنیا کوخاموشی توڑنا ہوگی، اقلیتوں پر مظالم کے بعد بھارت دنیا میں تنہا ہوتا جا رہا ہے۔

افغانستان سے متعلق عمران خان کا کہنا تھا کہ افغانستان کے کئی معاملات پاکستان کے ساتھ جڑے ہیں، افغانستان،پاکستان کی ثقافت،سیاست بھی ایک جیسی ہے۔ انہوں نے مزید کہا کہ افغانستان میں امن کا کریڈٹ پاکستان کو ملے گا۔

اسلام آباد: وزیر اعظم کی بلین ٹری سونامی مہم کو نقصان پہنچانے کی مبینہ کوشش پر وفاقی حکومت نے نوٹس لے لیا۔

اے آر وائی نیوز کے مطابق کوٹلی ستیاں کے جنگل میں درختوں کی کٹائی پر وفاقی حکومت نے نوٹس لے لیا، وزیر اعظم کے مشیر ماحولیات ملک امین اسلم نے کوٹلی ستیاں کا ہنگامی دورہ کر کے درخت کاٹنے کی اجازت دینے والا ڈسٹرکٹ فارسٹ افسر معطل کر دیا۔

ڈپٹی کمشنر نے کاٹے گئے درختوں کی لکڑی تحویل میں لے کر تحقیقات شروع کر دی، اس سلسلے میں مشیر ماحولیات ملک امین اسلم نے وزیر اعظم عمران خان سے بھی ملاقات کی اور واقعے کی تفصیلات سے وزیر اعظم کو آگاہ کیا۔ ملک امین اسلم کا کہنا تھا کہ درختوں کی کٹائی ٹمبر مافیا کی کارروائی لگتی ہے۔

دریں اثنا، وزیر اعظم عمران خان نے کلین اینڈ گرین مہم کو نقصان پہنچانے والوں کے خلاف ایکشن کی ہدایت کر دی، انھوں نے کہا کہ انتظامی سطح پر ملوث عناصر کو بھی سامنے لایا جائے۔ وزیر اعظم نے بروقت ایکشن لینے پر مشیر ماحولیات کی کوششوں کو سراہا۔

ملک امین اسلم کا کہنا تھا کہ درختوں کو کاٹنے والوں کو کسی صورت معاف نہیں کیا جائے گا، جنگلات کی حفاظت کے لیے پختون خوا طرز پر اقدامات ضروری ہیں، اس سلسلے میں قانون میں تبدیلی کی سمری پنجاب اسمبلی بھجوائے جائے گی۔

اسلام آباد: حکومت نے چین میں پھنسے طلبہ کے والدین کو ہر 10 دن بعد بریفنگ دینے کا فیصلہ کر لیا ہے۔

اے آر وائی نیوز کے مطابق کرونا وائرس کے باعث چین میں پھنسے پاکستانی طلبہ کی دیکھ بھال کے سلسلے میں آج معاون خصوصی زلفی بخاری نے طلبہ کے والدین سے ملاقات کی، مشیر صحت ڈاکٹر ظفر مرزا اور متعلقہ حکام بھی اس موقع پر موجود تھے۔

طلبہ کے والدین کو طلبہ کی صحت و سلامتی کے حوالے سے اہم امور پر تفصیلی بریفنگ دی گئی، ملاقات میں طلبہ کو خوراک اور رقم سمیت فراہم کی جانے والی دیگر سہولیات کا جائزہ بھی لیا گیا۔

زلفی بخاری نے اس موقع پر کہا کہ ہم والدین کے جذبات اور احساسات کو اچھی طرح سمجھ سکتے ہیں، والدین کو یقین دلاتا ہوں کہ تمام طلبہ محفوظ ہاتھوں میں ہیں، پاکستانی سفارت خانے کا عملہ ان سے مسلسل رابطے میں ہے، یہ ضروری ہے کہ والدین کے ہر سوال کا جواب دے کر انھیں مطمئن کیا جائے۔

انھوں نے کہا کہ حکومت چین میں پھنسے پاکستانی طلبہ کی مشکلات حل کرنا چاہتی ہے، اب والدین سے ہر 10 دن بعد جامع نشست کا اہتمام کیا جائے گا، انھیں بچوں کی صحت، خوراک، رقم اور دی جانے والی ہر سہولت سے با خبر رکھیں گے۔ ان کا یہ بھی کہنا تھا کہ چین میں کرونا وائرس کی صورت حال پر تیزی سے قابو پایا جا رہا ہے، ووہان میں کیسز میں بتدریج کمی رپورٹ ہوئی ہے۔

زلفی بخاری نے نجی ٹی وی چینل پر چلنے والی خبر کی تردید کرتے ہوئے کہا ہے کہ انھوں نے چین سے پاکستانی طلبہ کے انخلا کی بات نہیں کی۔

اسلام آباد: وزیر منصوبہ بندی اسد عمر نے ملک بھر میں ترقیاتی منصوبوں کے لئے فنڈز جاری کردیئے ، 200 سے زائد منصوبوں کے لیے700 ارب سے زائد پی ایس ڈی پی فنڈ خرچ کئے گئے۔

تفصیلات کے مطابق وفاقی حکومت نے ترقیاتی منصوبوں پر کام کی رفتار تیز کردی، وزیر منصوبہ بندی اسد عمر نےملک بھر میں ترقیاتی منصوبوں کے لئے فنڈز جاری کئے .

جس کے مطابق جولائی 2019 سے فروری 2020 تک ترقیاتی بجٹ کاتناسب 6 سال میں سب سے زیادہ ہے ، گزشتہ 7 ماہ میں پبلک سیکٹر ڈویلپمنٹ فنڈز کا استعمال 39 فیصد ریکارڈ ہوا جبکہ پچھلے 6 سال کے دورانیے میں بجٹ کے استعمال کا سب سے زیادہ تناسب ریکارڈکیاگیا۔

سال 2014-15 میں ترقیاتی فنڈز کے استعمال کا تناسب صرف 32 فیصد تک تھا جبکہ سی پیک منصوبوں کو ترجیحی طور پر مالی اعانت فراہم کی جا رہی ہے ، کراچی کوسٹل پاور پراجیکٹ اوردیامیر بھاشا ڈیم ٹاپ 10سرفہرست منصوبوں میں شامل ہیں۔

داسواورنیلم جہلم ہائیڈرو پراجیکٹس سمیت تربیلا فورتھ ایکسٹینشن اور 309 ارب کی لاگت سے بننے والے مہمند ڈیم پر بھی کام شروع کردیا گیا ہے ، ہاؤسنگ منصوبے سمیت درختوں کی سونامی مہم پر بھی اربوں خرچ کیےگئے ہیں۔

کراچی سےپشاوراور لاہور سےملتان موٹروے کا منصوبہ بھی 10سرفہرست منصوبوں میں ہیں ، کراچی سےلاہوراورسکھر سےحیدر آباد موٹروےمنصوبے کے لیے بھی رقم خرچ کی گئی اور قراقرم ہائی وے فیز 2 منصوبے پر 24.2 ارب روپے خرچ ہوئے۔

ملک بھر میں آبپاشی کا نظام بہتر بنانے سمیت زرعی منصوبوں پر بھی خطیر رقم خرچ کی گئی ہےجبکہ فصلوں کی پیداوار,لائیو اسٹاک کی بہتری سمیت ماہی گیروں کی ترقی کے منصوبے بھی شامل ہیں۔

ملک کےنہری نظام کی بہتری کے لیےفیز 2 پر بھی 5.5 ارب خرچ کیےگئے جبکہ گزشتہ 6 ماہ میں پشاورتا کراچی موٹروے پر 17.7 ارب خرچ ہوئے۔