Author: عبدالقادر

اسلام آباد: وفاقی حکومت نوجوانوں کا ایک اور درینہ مطالبہ پورا کرنے جا رہی ہے، اس سلسلے میں اسلامی بینکنگ کے تحت نوجوانوں کو قرضے فراہم کیے جائیں گے۔

تفصیلات کے مطابق وزیر اعظم عمران خان کے وژن کے مطابق وفاقی حکومت نے نوجوانوں کو اسلامی بینکاری کے تحت قرضوں کی فراہمی کا فیصلہ کیا ہے، آج گورنر اسٹیٹ بینک رضا باقر اور وزیر اعظم کے معاون خصوصی عثمان ڈار کی اس سلسلے میں اہم ملاقات ہوئی۔

ملاقات میں نوجوانوں کو اسلامی بینکنگ کے ذریعے قرضوں کی فراہمی پر حکمت عملی طے کی گئی، کامیاب جوان پروگرام کا اسلامی بینکنگ پر مشتمل مرحلہ بھی اپریل سے شروع کرنے کا فیصلہ کیا گیا، اس پروگرام کے لیے تمام نجی بینکوں کی خدمات حاصل کی جائیں گی۔

کامیاب جوان پروگرام کے بعد کامیاب دکاندار پروجیکٹ شروع کریں گے: عثمان ڈار

وزیر اعظم کے معاون خصوصی عثمان ڈار نے کہا کہ نوجوانوں کی بڑی تعداد نے اسلامی بینکنگ کے تحت قرض کی فراہمی کا مطالبہ کیا تھا، گورنر اسٹیٹ بینک اور اسٹیک ہولڈرز سے اس سلسلے میں مشاورت مکمل کر لی ہے۔

انھوں نے کہا کہ پہلے مرحلے کے تحت دی گئی درخواستوں کی اسکروٹنی جاری ہے، دوسرے مرحلے میں نوجوان اسلامی بینکنگ کے تحت قرض حاصل کر سکیں گے، جب کہ کامیاب درخواست گزاروں کو قرض کی تقسیم شروع کر دی گئی ہے۔

اسلام آباد: وزیر اعظم عمران خان کو وزارتوں اور ذیلی اداروں میں زیر التوا انکوائریز پر رپورٹ پیش کر دی گئی۔

تفصیلات کے مطابق پی ایم ڈلیوری یونٹ نے وزیر اعظم کی ہدایت پر وزارتوں اور اداروں کو مراسلہ جاری کرتے ہوئے ہدایت کی ہے کہ زیر التوا انکوائریز کی رپورٹ پر وزیر اعظم آفس کو 90 روز میں کارروائی کی رپورٹ پیش کی جائے۔

وزیر اعظم کو پیش کردہ رپورٹ میں کہا گیا ہے کہ تمام انکوائریز وزارتوں اور ذیلی اداروں کی سطح پر زیر التوا ہیں، ان میں فنانس ڈویژن 316 زیر التوا انکوائریز کے ساتھ سر فہرست ہے، جب کہ زرعی ترقیاتی بینک کی 237 انکوائریز زیر التوا ہیں۔

رپورٹ کے مطابق پوسٹل سروس کی 184، پاور ڈویژن کی 193 انکوائریز، وزارت داخلہ کی 110، انڈسٹریز پروڈکشن کی 245 انکوائریز زیر التوا ہیں، یہ انکوائریز کارکردگی اور نظم و ضبط کی خلاف ورزیوں پر مبنی ہیں، 14 جنوری کو پی ایم ڈی یو نے کابینہ میں بھی رپورٹ پیش کی تھی۔

ادارے اتنے مضبوط کر دوں گا جتنے پہلے کبھی نہیں ہوئے: وزیر اعظم

رپورٹ میں یہ بھی کہا گیا ہے کہ یہ زیر التوا انکوائریز پرموشن، ٹریننگ، اور بہتر کارکردگی کے راستے میں رکاوٹ ہیں، 2001 سے یہ انکوائریز زیر التوا ہیں جن کو نظر انداز کیا گیا۔

خیال رہے کہ وزیر اعظم عمران خان اداروں کی کارکردگی بہتر بنانے پر مسلسل توجہ مرکوز کر رہے ہیں، اس سلسلے میں ان کی حکمت عملی کے نتائج بھی سامنے آنے لگے ہیں، گزشتہ ماہ وزراتِ مواصلات نے کارکردگی رپورٹ جاری کرتے ہوئے بتایا تھا کہ نیشنل ہائی وے اتھارٹی (این ایچ اے) کی آمدن میں 25 ارب 80 کروڑ روپے کا ریکارڈ اضافہ ہوا۔

گزشتہ روز وزیر اعظم ہاؤس میں معروف قانون دان بابر اعوان کے ساتھ ملاقات میں انھوں نے اپنے اس عزم کو دہرایا تھا کہ وہ ملکی ادارے اتنے مضبوط کر دیں گے جتنے پہلے کبھی نہیں ہوئے۔

اسلام آباد: وزیر اعظم کے کامیاب جوان پروگرام کی عالمی سطح پر زبردست پذیرائی دیکھنے میں آ رہی ہے، یو اے ای حکومت نے پاکستان کو اس پروگرام میں تعاون کی بڑی پیش کش کر دی ہے۔

تفصیلات کے مطابق وزیر اعظم کے معاون خصوصی عثمان ڈار سے یو اے ای سفیر حماد عبید ابراہیم نے ملاقات کر کے پاکستانی نوجوانوں کے لیے 200 ملین ڈالرز کی رقم دینے کا اعلان کیا، رقم کا وعدہ ابوظبی کے ولی عہد محمد بن زید النہیان نے حالیہ دورے میں کیا تھا۔

متحدہ عرب امارات کے سفیر نے ملاقات میں کہا کہ پاکستانی نوجوانوں میں بے پناہ ٹیلنٹ اور صلاحیت دیکھی ہے، ہم پاکستان سے مل کر نوجوانوں کی تعمیر و ترقی کے لیے کردار ادا کریں گے، اس سلسلے میں پاکستانی نوجوانوں کے لیے عملی اقدامات کا آغاز جلد کیا جا رہا ہے۔

دریں اثنا، یو اے ای نے پاکستان کے ساتھ یوتھ ایکس چینج پروگرام شروع کرنےکا بھی اعلان کیا، ملاقات میں اس بات پر اتفاق کیا گیا کہ پاکستانی نوجوانوں کا وفد تربیت کے لیےمتحدہ عرب امارات بھیجا جائے گا، جہاں انھیں انٹرنشپ سمیت آرٹیفشل انٹیلی جنس مہارت سکھائی جائے گی، یواے ای نے پاکستانی نوجوانوں کو دبئی ایکسپو 2020 میں بھی شراکت داری کی پیش کش کرتے ہوئے اعلان کیا کہ دبئی ایکسپو میں پاکستانی نوجوانوں کو خصوصی پویلین دیے جائیں گے۔

سفیر نے گفتگو کرتے ہوئے کہا کہ حکومت پاکستان نوجوانوں کے لیے عملی اقدامات کر رہی ہے، مستقبل میں ہنرمند نوجوانواں کو شان دار مواقع فراہم کریں گے۔ معاون خصوصی عثمان ڈار نے پروگرام میں تعاون کی پیش کش کا خیر مقدم کرتے ہوئے کہا کہ وزیر اعظم کے وژن کے مطابق نوجوان طبقے کو اوپر اٹھانا ہے، ملکی تاریخ میں پہلی بار نوجوانوں پر خطیر سرمایہ کاری کی جا رہی ہے، نوجوان آنے والے برسوں میں ملکی معیشت میں ریڑھ کی ہڈی بنیں گے۔