ARYNews.tv | Urdu – Har Lamha Bakhabar

Author: عبدالقادر

  • نریندر مودی کو عالمی سطح پر شدید ردِ عمل دینے کی تیاری

    نریندر مودی کو عالمی سطح پر شدید ردِ عمل دینے کی تیاری

    اسلام آباد: وزیر اعظم عمران خان بھارتی وزیر اعظم نریندر مودی کے خلاف مزید متحرک ہو گئے ہیں، انھوں نے مودی کو عالمی سطح پر شدید ردِ عمل دینے کی تیاریوں کی ہدایت کر دی ہے۔

    تفصیلات کے مطابق نریندر مودی کو عالمی سطح پر شدید ردِ عمل دینے کی تیاری شروع ہو گئی ہے، مودی کی امریکا آمد پر شدید احتجاج کا فیصلہ کیا گیا ہے، وزیر اعظم نے پارٹی کی تنظیم برائے بین الاقوامی شعبہ جات کو تیاریوں کی ہدایت کر دی۔

    ڈاکٹر عبد اللہ ریاڑ کی وزیر اعظم سے ملاقات

    اس سلسلے میں آج وزیر اعظم ہاؤس میں عمران خان سے پارٹی کے سیکریٹری او آئی سی ڈاکٹر عبد اللہ ریاڑ نے خصوصی ملاقات کی، اس ملاقات میں انھوں نے اقوام متحدہ جنرل اسمبلی کے اجلاس میں شرکت کے لیے تیاریوں پر مشاورت کی۔

    اس موقع پر عمران خان نے بھارتی وزیر اعظم مودی کے خلاف بھرپور احتجاج کی ہدایت کی اور کہا کہ بھارتی بربریت کے خلاف کمیونٹی اور انسانی حقوق کی تنظیموں کو متحرک کیا جائے۔

    یہ بھی پڑھیں:  پاکستان کا مقبوضہ کشمیر کا مقدمہ عالمی عدالت میں لے جانے کا فیصلہ

    وزیر اعظم عمران خان کا کہنا تھا کہ مودی سرکار نے تمام انسانی و بین الاقوامی قوانین کو روند ڈالا ہے، مودی حکومت کشمیریوں کو نشانہ ستم بنانے کی تیاریوں میں ہے۔

    انھوں نے کہا کہ کشمیر سے متعلق سلامتی کونسل کی قراردادیں اور دو طرفہ معاہدے موجود ہیں، بھارت سرکار کے پاس کشمیر پر غاصبانہ قبضے کا کوئی جواز موجود نہیں۔

    وزیر اعظم کا کہنا تھا کہ بہ طور سفیر مقبوضہ کشمیر کے عوام کی آواز دنیا کے ہر فورم پر اٹھاؤں گا۔ ملاقات میں وزیر اعظم کے حالیہ دورۂ امریکا کے بعد کی صورت حال پر بھی گفتگو کی گئی۔

  • وزیر اعظم عمران خان کی زیر صدارت وفاقی کابینہ کا اجلاس کل طلب

    وزیر اعظم عمران خان کی زیر صدارت وفاقی کابینہ کا اجلاس کل طلب

    اسلام آباد : وزیر اعظم عمران خان نے وفاقی کابینہ کا اجلاس کل طلب کرلیا، وزیر خارجہ شاہ محمود قریشی کابینہ کو کشمیر سے متعلق پیش رفت پر بریفنگ دیں گے اور اقوام متحدہ سیکورٹی کونسل کے اجلاس کے بعد کی صورتحال پر بھی غور کیا جائے گا۔

    تفصیلات کے مطابق وزیر اعظم عمران خان کی زیر صدارت وفاقی کابینہ کا اجلاس کل ہوگا ، اجلاس کا 9 نکاتی ایجنڈا جاری کردیا گیا ہے ، کابینہ اجلاس میں مقبوضہ کشمیر اور پاک بھارت سرحد کی صورتحال کاجائزہ لیاجائےگا اور مقبوضہ کشمیر سےمتعلق خصوصی کمیٹی کی تجاویز پیش کی جائیں گی۔

    ذرائع کا کہنا ہے کہ وزیر خارجہ کابینہ کو کشمیر سے متعلق پیش رفت پر بریفنگ دیں گے اور سلامتی کونسل کے اجلاس کے بعد کی صورتحال پر بھی غور کیا جائےگا۔

    اجلاس میں کابینہ اراکین عوامی مفادات کے اقدامات سے متعلق تجاویز پیش کریں گے جبکہ وزارت مواصلات ایک سال کی کارکردگی پر کابینہ کو بریفنگ دے گی

    وفاقی کابینہ گزشتہ ای سی سی اور کمیٹی برائےنجکاری کے فیصلوں کی توثیق کرے گی، کم قیمت گھروں کےمنصوبہ کےلیے5ارب قرض کی منظوری اور پاک ترک اسٹرٹیجک اکنامک فریم ورک کی منظوری بھی ایجنڈے میں شامل ہیں۔

    گھریلوتشدد سےتحفظ اور روک تھام کے بل کی منظوری ، کابینہ کرسچن شادی اورطلاق بل 2019 کی منظوری اور اینٹی ڈمپنگ ایپلیٹ ٹریبونل کے چئیرمین اور 2ممبران کی تعیناتی بھی ایجنڈے کا حصہ ہیں۔

    مزید پڑھیں : فارن آفس میں کشمیر سیل قائم کرنے کا فیصلہ، پاک فوج کسی بھی جارحیت کا بھرپور جواب دے گی

    یاد رہے 17 اگست کو مقبوضہ کشمیر کی صورتحال پر خصوصی کمیٹی کا پہلا ان کیمرہ اجلاس ہوا تھا ، جس کی صدارت وزیر خارجہ شاہ محمود قریشی نے کی تھی۔

    وزیر خارجہ شاہ محمود قریشی کا کہنا تھا کہ مسئلہ کشمیر کے سیاسی اور عسکری پہلو ہیں، فیصلہ کیا ہے کہ سیاسی محاذ پر فارن آفس میں خصوصی کشمیر ڈیسک قائم کی جائے گی جبکہ عسکری محاذ پر ڈی جی آئی ایس پی آر کا کہنا تھا کہ بھارت ایل او سی پر کشیدگی بڑھا رہا ہے ، خلاف ورزی پر بھرپور جواب دیا جائے گا۔

  • بھارت نے دریائے ستلج میں پانی چھوڑ دیا، سیلاب کا خطرہ

    بھارت نے دریائے ستلج میں پانی چھوڑ دیا، سیلاب کا خطرہ

    لاہور: بھارت نے دریائے ستلج میں بغیر اطلاع پانی چھوڑ دیا جس کے نتیجے میں سیلاب کا خدشہ پیدا ہوگیا ہے۔

    تفصیلات کے مطابق دریائے ستلج میں بھارتی پنجاب سے آنے والے ریلے سے سیلاب کا خطرہ ہے، این ڈی ایم اے نے وارننگ جاری کردی ہے، اداروں کو ہائی الرٹ رہنے کی ہدایت کردی گئی۔

    رپورٹ کے مطابق 12 سے 24 گھنٹوں میں پانی گنڈا سنگھ والا کے مقام پر پاکستان میں داخل ہوگا، ڈیڑھ سے 2 لاکھ کیوسک پانی پاکستانی حدود میں داخل ہوسکتا ہے۔

    بھارت نے لداخ ڈیم کے 5 میں سے 3 اسپل ویز کھول دئیے ہیں، پی ڈی ایم اے پنجاب، قصور اور دریائے سندھ کے اطراف انتظامیہ کو الرٹ کردیا گیا ہے۔

    ترجمان این ڈی ایم اے کے مطابق پانی خرمنگ کے مقام پر دریائے سندھ میں شامل ہوگا، بھارت نے سرکاری طور پر ابھی تک اطلاع نہیں دی ہے۔

    مزید پڑھیں: بھارت کا دریائے چناب کے بعد دریائے جہلم میں پانی چھوڑنے کا خدشہ

    محکمہ موسمیات نے بھی دریائے ستلج میں پانی کی سطح بلند ہونے کی پیش گوئی کی ہے تاہم سیلاب سے متعلق کوئی وارننگ جاری نہیں کی گئی ہے۔

    اطلاعات ہیں کہ دریائے ستلج میں 1988 کے بعد یہ ایک بڑا سیلاب ہوگا جس سے ہزاروں ایکڑ زمین اور سیکڑوں دیہات متاثر ہوسکتے ہیں۔

    واضح رہے کہ بھارت کی جانب سے دریائے جہلم میں بھی پانی چھوڑا جارہا ہے، مظفرآباد آزاد کشمیر کی انتظامیہ نے اس سلسلے میں الرٹ جاری کردیا ہے۔

    گزشتہ روز بھارت نے آبی دہشت گردی کرتے ہوئے دریائے چناب میں پانی چھوڑ دیا تھا، جس کے باعث دریائے چناب میں درمیانے درجے کا سیلاب آیا۔

    فلڈ فار کاسٹنگ ڈویژن کے ترجمان کا کہنا تھا کہ دس گھنٹے کے دوران ہیڈ مرالہ کے مقام پر پانی کی آمد میں ایک لاکھ کیوسک اضافہ ہوا۔

  • مقبوضہ کشمیرکی تشویشناک صورتحال وزیراعظم کی ترجیح ، قوم سے خطاب مؤخر ہونے کا امکان

    مقبوضہ کشمیرکی تشویشناک صورتحال وزیراعظم کی ترجیح ، قوم سے خطاب مؤخر ہونے کا امکان

    اسلام آباد : وزیراعظم عمران خان نے کشمیرکی تشویشناک صورتحال دیگرسیاسی سرگرمیاں محدودکردیں ، وزیراعظم کا حکومتی کارکردگی پر قوم سے خطاب مؤخر ہونے کا امکان ہے۔

    تفصیلات کے مطابق مقبوضہ کشمیرکی تشویشناک صورتحال وزیراعظم عمران خان کی ترجیح بن گئی اور عمران خان نے دیگر سیاسی سرگرمیاں محدود کردیں اور کل ہونے والا دورہ لاہور منسوخ کر دیا۔

    ایک سالہ حکومتی کارکردگی کواجاگر کرنے کا معاملہ بھی کھٹائی میں پڑ گیا ہے جبکہ وزیراعظم کاحکومتی کارکردگی پرقوم سےخطاب مؤخر ہونے کا امکان ہے۔

    وزیر اعظم نےایک سالہ کارکردگی پرقوم سے خطاب  سے متعلق  رفقاء سے  مشاورت شروع کردی ہے ، ذرائع وزیراعظم آفس کا کہنا ہے کہ  وزیراعظم فوری طور پر قوم سے خطاب نہیں کریں گے۔

    وزیر اعظم آج بھی عالمی رہنماوں اور مختلف سربراہان مملکت سے رابطے کریں گے۔

    مزید پڑھیں :  کشمیریوں کی تکالیف کا ازالہ کرنا اقوام متحدہ کی ذمہ داری ہے: وزیر اعظم

    خیال رہے وزیر اعظم نے 18 اگست کو ایک سال مکمل ہونے پر قوم سے خطاب کا پلان بنارکھا تھا، جس میں وہ ایک سالہ حکومتی کارکردگی سے قوم کو آگاہ کرتے۔

    یاد رہے وزیر اعظم عمران خان کا کہنا تھا کہ 50 سال میں پہلی بار مقبوضہ کشمیر پر سلامتی کونسل کا اجلاس ہوا، کشمیریوں کی تکالیف کا ازالہ کرنا اور تنازعے کا حل عالمی ادارے کی ذمہ داری ہے۔

    واضح  رہے مقبوضہ کشمیر میں بھارت کے غاصبانہ اقدامات کے باعث صورتحال بدستور کشیدہ ہے، مقبوضہ وادی میں مسلسل کرفیوسے کھانے پینے کی اشیا اوردواؤں کی شدید قلت ہوگئی ہے۔

  • وزیراعظم عمران خان کا پمز اسپتال کا دورہ، مریضوں کی عیادت

    وزیراعظم عمران خان کا پمز اسپتال کا دورہ، مریضوں کی عیادت

    اسلام آباد: وزیراعظم عمران خان نے پمز اسپتال کا دورہ کیا اور مریضوں کی عیادت کی۔

    تفصیلات کے مطابق وزیراعظم عمران خان نے پمز اسپتال کا دورہ کیا اور مریضوں کو فراہم سہولتوں کا جائزہ لیا، وزیراعظم نے مریضوں کے علاج معالجے اور سہولتوں سے متعلق دریافت کیا۔

    نمائندہ اے آر وائی نیوز عبدالقادر کے مطابق اسپتال انتظامیہ نے مریضوں کو فراہم سہولتوں کے بارے میں وزیراعظم عمران خان کو آگاہ کیا۔

    واضح رہے کہ اس سے قبل وزیراعظم عمران خان نے عید الاضحیٰ کی نماز بنی گالا میں قائم مسجد میں ادا کی، سیکیورٹی اسٹاف اور دیگر ملازمین نے بھی وزیراعظم کے ساتھ نماز ادا کی۔

    وزیراعظم عمران خان کا کہنا تھا کہ قربانی کے جذبے کے بغیر دنیا کی کوئی قوم ترقی نہیں کرسکتی، قربانی کا جذبہ ہر قسم کی مشکلات کو خندہ پیشانی سے برداشت کرنے کا نام ہے۔

    ان کا کہنا تھا کہ پاکستان معاشی اور معاشرتی مشکلات کے دور سے گزر رہا ہے، قوم کو اقتصادی بحالی کی حکومتی کوششوں میں تعان کرنا ہوگا۔

    یاد رہے کہ وزیراعظم عمران خان نے کراچی کی صورت حال کا نوٹس لیتے ہوئے کراچی سے منتخب تمام ارکان اسمبلی کو عید پر اپنے حلقوں میں رہنے کی ہدایت کی تھی۔

  • مقبوضہ کشمیر کا معاملہ، ایرانی صدر نے پاکستان کو اپنے تعاون کا یقین دہانی کرادی

    مقبوضہ کشمیر کا معاملہ، ایرانی صدر نے پاکستان کو اپنے تعاون کا یقین دہانی کرادی

    اسلام آباد: وزیراعظم عمران خان نے ایرانی صدر حسن روحانی سے اپیل کی ہے کہ خطےکااہم اسلامی ملک ہونےکےناطےایران کشمیر کے لیے اپنا کردار ادا کرے۔

    تفصیلات کے مطابق وزیراعظم پاکستان اور ایرانی صدر حسن روحانی کے درمیان ٹیلی فونک رابطہ ہوا جس میں عمران خان نے مقبوضہ کشمیر کی موجودہ صورتحال اور بھارت کے غیر آئینی اقدام سے حسن روحانی کا آگاہ کیا۔

    ایرانی صدر نے مسئلہ کشمیر کو سفارتی طریقے سے حل کرنے پر زور دیتے ہوئے کہا کہ مسئلہ کشمیر کا حل فوجی طاقت سے نہیں بلکہ سفارتی طریقے سے ہی حل کرنا ہوگا، ایران مسلم قوموں کوحقوق دلوانےمیں تعاون سے کبھی دریغ نہیں کرےگا۔

    حسن روحانی کا کہنا تھا کہ پاک ایران تعلقات ہمیشہ سےبرادرانہ اور گہرے ہیں اور ہمارا رشتہ مستقبل میں بھی ایسا ہی رہے گا، ایران خطےمیں قیام امن وسلامتی کےلئےہرممکن کوشش کرےگا۔

    اس موقع پر وزیراعظم عمران خان کا کہنا تھا کہ معصوم کشمیریوں سےبھارتی سلوک عالمی قوانین کی خلاف ورزی ہے، خطےمیں بڑھتی کشیدگی پرپاکستان کو شدید تحفظات ہیں۔

    عمران خان نے اپیل کی کہ خطےکا اہم اسلامی ملک ہونےکےناطے ایران مسئلہ کشمیر کے لیے اپنا کردار ادا کرے۔ ٹیلی فونک گفتگو کے دوران ایرانی صدرحسن روحانی کی پاکستانی عوام کوعیدالضحیٰ کی مباکباد بھی دی۔

  • کشمیر میں بھارتی جارحیت، وزیراعظم نے اہم اجلاس طلب کرلیا

    کشمیر میں بھارتی جارحیت، وزیراعظم نے اہم اجلاس طلب کرلیا

    اسلام آباد : بھارت کی جانب سے کلسٹر بم حملے کے بعد کی صورتحال کا جائزہ لینے کےلیے وزیر اعظم عمران خان نے قومی سلامتی کمیٹی کا اجلاس آج طلب کرلیا۔

    تفصیلات کے مطابق پاکستان کے وزیر اعظم عمران خان نے بھارتی فورسز کی جانب سےایل او سی پر شہریوں کو نشانہ کے حوالے سے قومی سلامتی کا اجلاس طلب کیا ہے جس میں مسلح افواج کے سربراہان، انٹیلی جنس حکام اور سول قیادت شریک ہوگی۔

    ذرائع کا کہنا ہے کہ قومی سلامتی کے اجلاس میں کشمیر کی صورتحال سمیت بھارتی جارحیت کا جائزہ لیا جائے گا۔

    یاد رہے کہ گزشتہ دنوں بھارتی فورسز کی جانب سے لائن آف کنٹرول پر شہریوں کونشانہ بنانےکے لئےکلسٹر ٹوائے بم کا استعمال کیا تھا، کلسٹرٹوائے بم سے 4سال کے بچے سمیت 2شہری شہید اور 11 زخمی ہوئے تھے۔

    پاک فوج کے شعبہ تعلقات عامہ کے ادارے آئی ایس پی آر نے کہا ہے کہ بھارتی فوج نے 30 اور 31جولائی کوآبادی کو نشانہ بنایا، بھارت نے وادی نیلم میں کلسٹر ٹوائے بم سے آبادی کو ٹارگٹ کیا، کلسٹر ٹوائے بم سے 4سال کے بچے سمیت2 شہری شہید اور 11 زخمی ہوئے تھے۔

    کلسٹربم یا اس میں بارود کا استعمال عالمی قوانین کے تحت ممنوع ہے، شہریوں پر کلسٹر ٹوائے بم کے استعمال سے بھارت کا مکروہ چہرہ بے نقاب ہوگیا، عالمی برادری کو بھارت کے اس جارحانہ اقدام کا نوٹس لینا چاہئے۔

    خیال رہے کلسٹرٹوائے بم شہریوں کیخلاف تباہ کن ہتھیار ہے، اس بم سے بچوں،گھروں کوخصوصی طورپرنشانہ بنایاجاتا ہے اور یہ بم اپنے ٹارگٹ پرکھلونوں کی شکل میں بکھرجاتا ہے، اس بم سے40فیصدبچےنشانہ بنتے ہیں اور اکثر بچے کلسٹرٹوائے بم کو کھلونا سمجھ کر گھر لے جاتے ہیں۔

    کلسٹرٹوائے بم پھٹنے کے بعد بلیڈ کی طرح ہزاروں ٹکڑوں میں پھیلتا ہے ، یہ بم بارودی سرنگوں سے زیادہ خطرناک ہیں جبکہ جنیوا کنونشن اور عالمی قوانین کے تحت کلسٹر ٹوائے بم ممنوع ہے۔

  • پتوکی میں تہرے قتل کی واردات، وزیراعظم نے متاثرہ ماں کی دہائی سن لی

    پتوکی میں تہرے قتل کی واردات، وزیراعظم نے متاثرہ ماں کی دہائی سن لی

    اسلام آباد: وزیراعظم عمران خان نے حبیب آباد شیر گڑھ روڈ پر فائرنگ کے نتیجے میں جاں بحق ہونے والے والدین اور بچی کے قتل کا نوٹس لیتے ہوئے رپورٹ طلب کرلی۔

    تفصیلات کے مطابق پنجاب کے علاقے پتوکی میں واقع حبیب آباد شیر گڑھ روڈ پر ٹارگٹ کلنگ کا واقعہ پیش آیا تھا جس میں میاں بیوی اور بچی کو قتل کیا گیا۔

    مقتولہ کی والدہ نے وزیراعظم سے قتل کے واقعے کی تحقیقات کا نوٹس لینے اور انصاف کی فراہمی کا مطالبہ کیا تو عمران خان نے بوڑھی ماں کی دہائی سُن لی۔

    وزیراعظم آفس نے مقتولہ صنم زہرا کی والدہ سے رابطہ کیا اور عمران خان کا خصوصی پیغام پہنچایا۔ متاثرین کے اہل خانہ کو یقین دہانی کرائی گئی انہیں جلد انصاف فراہم کیا جائے گا اور قاتلوں کو قرار واقعی سزا بھی دی جائے گی۔

    یاد رہے کہ تین روز قبل پتوکی کے حبیب شیرگڑھ روڈ پر نامعلوم افراد نے گاڑی کو روک کر اُس پر فائرنگ کی تھی جس کے نتیجے میں ماں ، باپ اور کم عمر بچی زخمی ہوئے تھے البتہ سناٹے کی وجہ سے زخمیوں کو بروقت اسپتال نہ پہنچایا جاسکا اور جب ریسکیو 1122 کا عملہ پہنچا تو تینوں دم توڑ چکے تھے۔

  • تین وزرائے اعظم کا دورہ امریکا، عمران خان نے سادگی کی مثال قائم کی، سابق حکمرانوں‌ نے کروڑوں‌ اڑائے

    تین وزرائے اعظم کا دورہ امریکا، عمران خان نے سادگی کی مثال قائم کی، سابق حکمرانوں‌ نے کروڑوں‌ اڑائے

    اسلام آباد: وزیراعظم عمران خان نے دورۂ امریکا میں اپنے اخراجات کم کرکے کفایت شعاری کی مثال قائم کردی۔

    نمائندہ اے آر وائی نیوز عبدالقادر کے مطابق وزیراعظم عمران خان،نواز شریف اورآصف زرداری کے دورۂ امریکا کی تفصیلات سامنے آگئیں جس میں بتایا گیا ہے کہ سب سے مہنگا دورہ آصف زرداری نے 2009 میں کیا۔

    اے آر وائی نیوز کو حاصل ہونے والی تفصیلات کے مطابق آصف زرداری نے 2009 میں 6 روزہ دورہ امریکا میں قومی خزانے سے 7 لاکھ 52 ہزار 688 ڈالرز خرچ کیے۔ اسی طرح نواز شریف کے2013میں ہونے والے 6روزہ دوےپر5لاکھ49ہزار853ڈالرز کے اخراجات آئے۔

    مزید پڑھیں: دورۂ امریکا: وزیر اعظم عمران خان نے سادگی کی نئی تاریخ رقم کر دی

    حال ہی میں وزیراعظم عمران خان نے امریکی صدر ٹرمپ کی دعوت پر امریکا کا دورہ کیا اور کفایت شعاری کی مثال قائم کی، انہوں نے نہ سرکاری جہاز استعمال کیا اور نہ ہی سابق حکمرانوں کی طرح 7 اسٹار ہوٹل میں رہائش کی اور نہ وہ اپنے اہل خانہ میں سے کسی کو ساتھ لے کر گئے۔

    عمران خان کے دورۂ امریکا پر صرف 67 ہزار 180 روپے کے اخراجات آئے، وزیر اعظم نے سادگی کی مثال قائم کرتے ہوئے قومی خزانے کے کروڑوں روپے اس دورے میں بچائے جبکہ کامیاب سفارت کاری کر کے بھی دنیا کو مثبت پیغام دیا۔

    عمران خان کے دورۂ امریکا کے بعد پاکستان کا مثبت چہرہ دنیا کے سامنے آیا کیونکہ وہاں پر وزیراعظم نے میڈیا سمیت ہر موقع پر نپی تلی گفتگو کرتے ہوئے قوم کا سر فخر سے بلند کیا۔