لاہور : لاہور ہائیکورٹ نے پی ٹی آئی رہنما صنم جاوید کو بڑا ریلیف دیتے ہوئے جیل سے فوری رہا کرنے کا حکم دے دیا۔
تفصیلات کے مطابق پی ٹی آئی رہنما صنم جاوید کی گوجرنوالہ کے مقدمے میں گرفتاری کیخلاف درخواست کا تحریری فیصلہ جاری کردیا۔
جسٹس اسجد جاوید کی سربراہی میں دو رکنی بینچ نے14 صفحات کاتحریری فیصلہ جاری کیا ، جس میں لاہور ہائیکورٹ نےپی ٹی آئی رہنما کو جیل سےفوری رہاکرنے کا حکم دے دیا۔
فیصلے میں کہا گیا کہ تفتیشی افسر کےپاس درخواست گزار کو مقدمے میں نامزدکرنے کےشواہدنہیں، درخواست گزارکیخلاف گوجرنوالہ کامقدمہ بدنیتی کی بنیادپر درج کیا گیا، درخواست گزار کومقدمے سے ڈسچارج کیا جاتا ہے.
لاہورہائیکورٹ کا کہنا تھا کہڈپٹی پراسیکیوٹر جنرل نے بیان دیا پی ٹی آئی رہنما کیخلاف مزید کوئی مقدمہ نہیں ، وہ کسی اور مقدمےمیں مطلوب نہیں تو فوری جیل سے رہا کیا جائے۔
عدالت نے کہا کہ درخواست گزار کو باربار ایک نوعیت کے مقدمے میں نامزدکرنا بدنیتی ظاہر کرتاہے اور رہائی کےبعدبار بار گرفتار کرنا عدالتی نظام کو شکست دینا ہے، درخواست گزار کےجیل میں ہونے کے باوجودنظر بندی کے احکامات جاری کیےگئے۔
عدالت بڑے پن کا مظاہرہ کرتے ہوئے ڈی سی لاہوراورگوجرانوالہ کیخلاف کارروائی نہیں کررہی اور امید کرتی ہے ڈپٹی کمشنرز آئندہ عدالتی احکامات کی خلاف ورزی نہیں کریں گے۔
فیصلے میں کہنا تھا کہ وہی ریاستیں ترقی کرتی ہیں جہاں عدالتوں کے فیصلوں پر عمل درآمد ہو، جہاں عدالتی فیصلے ہوا میں اڑا دیے جائیں وہاں افراتفری پھیلتی ہے ، جسمانی ریمانڈدینےوالی عدالتوں کوبھی ریمانڈدیتےوقت بنیادی حقوق سامنےرکھنےچاہئیں۔
