Author: عابد خان

لاہور : لاہور ہائی کورٹ میں پی آئی اے کے فلائٹ کچن ٹھیکے پر دینے کے خلاف درخواست دائر کردی گئی، جس میں کہا گیا ہے کہ ٹھیکے سے پی آئی اے کو 80 کروڑ روپے کا خسارہ ہوگا۔

تفصیلات کے مطابق پی آئی اے کے فلائٹ کچن ٹھیکے پر دینے کے خلاف درخواست دائر کردی گئی ، پیپلز لیبر یونین نے نبیل جاوید ایڈوکیٹ کی وساطت سے لاہور ہائی کورٹ میں درخواست دائر کی گئی۔

درخواست میں وفاقی حکومت، پی آئی اے سمیت دیگر کو فریق بنایا گیا ہے اور مؤقف میں کہا گیا ہے کہ فلائٹ کچن پر سالانہ لاگت 55 کروڑ آتی ہے، ٹھیکہ ایک ارب 32 کروڑ کا دے دیا گیا،ٹھیکے سے پی آئی اے کو 80 کروڑ روپے کا خسارہ ہو گا۔

درخواست میں کہنا تھا کہ دو نجی کمپنیوں کا لاہور اور اسلام آباد کا ٹینڈر منظور کر لیا گیا ہے، اب کراچی فلائٹ کچن کی نیلامی ہوناباقی ہے۔

پیپلز لیبر یونین نے کہا کہ پی آئی اے کی پہلے ہی مالی پوزیشن بہتر نہیں ، استدعا ہے کہ عدالت فلائیٹ کچن ٹینڈر کو کالعدم قرار دے۔

لاہور : لاہور ہائیکورٹ نے ٹیکسی ڈرائیور کے قتل کے الزام میں سزائے موت پانے والے ملزم کو شک کا فائدہ دیتے ہوئے بری کردیا ۔

تفصیلات کے مطابق لاہور ہاہیکوٹ کے جسٹس ملک شہزاد احمد خان کی سربراہی میں دو رکنی بینچ نے ٹیکسی ڈرائیور کے قتل کے ملزم کی اپیل کا تحریری فیصلہ جاری کردیا۔

فیصلے میں کہا گیا ہے کہ پراسکیوشن اپنا کیس ثابت کرنے میں ناکام رہی مقدمہ تاخیر سے درج ہوا اور مقدمہ درج کرتے وقت کوئی نامزد ملزم نہیں تھا جبکہ ملزم الفت کو بعد میں نامزد کیا گیا۔

فیصلے میں مزید کہا گیا ہے کہ مدعی کے مطابق ملزم الفت کی بیوی کا مقتول شفیق کے ساتھ تعلق تھا، ملزم الفت نے اس وجہ سے بھائی شفیق کو قتل کیا۔

عدالتی فیصلے میں کہا گیا کہ ملزم الفت کی بیوی کے موبائل سے ملنے والی مقتول شفیق کی تصاویر کا فرانزک نہیں کروایا گیا اور گواہوں کے بیانات میں بھی تضاد پایا گیا، لہذا عدالت ملزم کو بری کرنے کا حکم دیتی ہے۔

خیال رہے ملزم الفت کو تھانہ پاکپتن میں درج مقدمے میں جولائی 2018 میں نامزد کیا تھا، بعد ازاں ٹرائل کورٹ نے 2019 میں ملزم الفت کو سزائے موت کا حکم دیا تھا۔

لاہور : لاہور ہائی کورٹ نے پی ٹی آئی کارکن صنم جاوید کے شوہرعتیق ریاض کی ضمانت منظور کر لی، جناح ہاؤس حملے کے مقدمے میں گرفتار ہیں۔

تفصیلات کے مطابق لاہور ہائیکورٹ میں پی ٹی آئی کارکن صنم جاوید کے شوہر کی درخواست ضمانت پر سماعت ہوئی۔

لاہور ہائیکورٹ کے2 رکنی بینچ نے وکلاکےدلائل کے بعد فیصلہ سنایا اور صنم جاوید کےشوہرعتیق ریاض کی ضمانت منظور کرلی۔

لاہورہائیکورٹ نے صنم جاوید کےشوہرعتیق ریاض کی ضمانت منظور کرلی۔

ملزم عتیق ریاض جناح ہاؤس حملےکے مقدمے میں گرفتار ہیں اور ان کیخلاف تھانہ سرور روڑ پولیس نے مقدمہ درج کررکھا ہے۔

لاہور : لاہور ہائی کورٹ نے اسموگ تدارک کیس میں ریسٹورینٹ کا وقت بڑھانے کی درخواست مسترد کر دی اور غلط پارکنگ کرنے والوں کو جرمانہ کرنے کا حکم دیا۔

تفصیلات کے مطابق لاہور ہائی کورٹ کے جسٹس شاہد کریم نے اسموگ تدارک کیس کی سماعت کی ، ہارون فاروق سمیت دیگر کی درخواستوں پر سماعت ہوئی۔

درخواست گزار اظہر صدیق ایڈووکیٹ نے بتایا کہ پی ایس ایل میچز شروع ہوگئے اور عدالتی احکامات پر عملدرآمد نہیں ہو رہا، عدالتی احکامات پر معاملات بڑی مشکل سے ٹھیک ہوئے تھے۔

عدالت نے ریمارکس دئیے کہ آپ درخواست لائیں پی ایس ایل کے خلاف حکم امتناعی جاری کر دیتے ہیں، ٹریفک جام اور ماحول کی بہتری کیلئے بڑی کوششیں کیں۔

ریسٹورینٹس کے وکیل نے عدالت سے استدعا کی کہ ریسٹورینٹس کا ایک گھنٹہ وقت بڑھا دیا جائے، جس پر عدالت نے ریمارکس دئیے کہ ریسٹورینٹس والوں نے بہت تنگ کیا ہوا ہے، وقت میں رعایت بالکل نہیں دی جا سکتی۔

پی ایچ اے کے وکیل نے بتایا کہ شاہدرہ کے قریب پی ایچ اے نے 16 ہزار درخت لگائے ہیں، ایریگیشن سے ایک درخت کاٹنے پر تین درخت لگانا طے پایا تھا ، اب تک ایرگیشن والوں نے 3 سو درخت لگا دئیے ہیں۔

جس پر ممبر کمیشن نے کہا کہ کمیشن کے لوگوں کے تبادلے کیے جارہے ہیں تو سرکاری وکیل نے بتایا کہ الیکشن کی وجہ سے لوگوں کے تبادلے ہوئے ہیں۔

درخواست گزار کے وکیل نے بتایا کہ سوشل میڈیا کو بھی ایکٹویٹ کرنے کی ضرورت ہے، گھروں میں پودے لگائے جانے چاہیے، ہیٹ ویو اسموگ کی روک تھام کے لیے میڈیا کو بھی اشتہار چلانے چاہیے، اسکول و کالجز میں ایک پیریڈ ہونا چاہیے جس میں بچوں کو درختوں کی اہمیت کی آگاہی دینی چاہیے۔

جس پر عدالت نے ریمارکس دئیے کہ ایسا ضروری ہے ایسا ہونا چاہیے عدالت نے غلط پارکنگ کرنے والوں کو بھاری جرمانے کرنے کی ہدایت کی اور کیس کی سماعت 23 فروری تک ملتوی کردی۔

لاہور : لاہور ہائی کورٹ نے این اے 119 سے ن لیگی رہنما مریم نواز اور این اے117سے آئی پی پی کے رہنما علیم خان کے انتخابی نتائج روکنے کی درخواست پر فیصلہ محفوظ کرلیا۔

تفصیلات کے مطابق لاہور ہائی کورٹ میں این اے 119 سے مریم نواز کی کامیابی کے انتخابی نتائج روکنے کی درخواست پر سماعت ہوئی۔

جسٹس علی باقر نجفی کی عدالت میں آزاد امیدوارشہزاد فاروق کےوکیل نےدلائل دیتے ہوئے کہا کہ مریم نواز فارم 45 کے مطابق ہار چکی ہیں، ریٹرنگ افسر نے مبینہ طور پر مریم نواز کو فاتح قرار دیا۔

وکیل درخواست گزار کا کہنا تھا کہ فارم 45 کے نتائج ہمارے پاس موجود ہیں،عدالت فارم 45 کے مطابق نتائج جاری کرنے کا حکم دے، جس کے بعد عدالت نے درخواست کے قابل سماعت ہونے پر فیصلہ محفوظ کرلیا۔

دوسری جانب لاہور ہائی کورٹ میں این اے117 سے آئی پی پی کے رہنما علیم خان کی کامیابی کے خلاف درخواست کی سماعت ہوئی۔
لاہور ہائیکورٹ جسٹس علی باقر نجفی نےدرخواست قابل سماعت ہونے پرفیصلہ محفوظ کرلیا

لاہورہائیکورٹ میں آزاد امیدوار علی اعجاز کی جانب سے درخواست دائرکی گئی، جس میں مؤقف اپنایا گیا کہ علیم خان فارم 45 کے مطابق ہار چکے ہیں،علیم خان نے مبینہ ملی بھگت سے فارم 47 میں خود کو فاتح قرار دیا۔

درخواست میں استدعا کی گئی کہ عدالت فارم 45 کے مطابق نتائج جاری کرنے کا حکم دے اور الیکشن کمیشن کو حتمی نتیجہ جاری کرنے سے روکنے کا حکم دے ساتھ ہی این اے 177 کا نتیجہ کالعدم قرار دے۔