لاہور: سپریم کورٹ نے لاہور کے پرائیوٹ اسپتالوں میں مہنگے علاج کا از خود نوٹس لیتے ہو ے اسپتال مالکان، سیکرٹری صحت اور ہیلتھ کئیر کمیشن افسران کو طلب کر لیا۔
تفصیلات کے مطابق سپریم کورٹ لاہور رجسٹری میں چیف جسٹس پاکستان کی سربراہی میں دو رکنی بنچ نے پرائیویٹ ہسپتالوں کے مہنگے علاج پر ازخود نوٹس کی سماعت کی ، چیف جسٹس کا کہنا تھا کہ روزانہ کی بنیاد پر پرائیویٹ اسپتالوں کے خلاف شکایتیں موصول ہورہی ہیں ۔
چیف جسٹس نے اسپتالوں کے چارجز کی لسٹیں عدالت میں پیش کرنے کا حکم دے دیا اور ہدایت کی کہ پرائیویٹ ہسپتالوں کے مالکان کل گیارہ بجے ان لسٹوں کو لے کر پیش ہوں ۔ چیف جسٹس نے قرار دیا کہ پرا ئیویٹ اسپتالوں میں علاج کے نام پر لوٹ مار کا بازار گرم ہے، اسپتالوں میں مریضوں کو سہولیات دی نہیں جاتیں لیکن لاکھوں بٹور لیے جاتے ہیں ۔
ان کا کہنا تھا کہ روزانہ کی بنیاد پر پرائیویٹ اسپتالوں کے خلاف شکایات موصول ہو رہی ہیں، پرائیویٹ اسپتالوں کو لوٹ مار کی اجازت نہیں دی جا سکتی۔
چیف جسٹس آف پاکستان نے اپنے ریمارکس میں کہا کہ اسپتالوں میں پارکنگ نہیں ہوتی، سڑکوں پر قبضہ کیا ہوتا ہے اگر آج کے بعد کسی پرائیویٹ ہسپتال کے باہر گاڑی نظر آئی تو فی گاڑی دس ہزار جرمانہ ہو گا اور یہ جرمانہ ڈیم فنڈ میں جمع کروایا جائے گا۔
دورانِ سماعت چیف جسٹس نے نالوں پر بنے اسپتالوں کے متعلق محکمہ ماحولیات سے رپورٹ طلب کر لی جبکہ ڈی جی ایل ڈی اے کو حمید لطیف ہسپتال کا دورہ کرکے غیر قانونی تعمیرات کی رپورٹ پیش کرنے کا حکم بھی دے دیا۔
