Author: عابد خان

لاہور: لاہور ہاٸی کورٹ اپیلیٹ ٹریبونل نے بانی پی ٹی آٸی کے حلقہ این اے 122 سے کاغذات نامزدگی مسترد ہونے کے خلاف اپیل پر فیصلہ محفوظ کر لیا۔

تفصیلات کے مطابق لاہور ہاٸی کورٹ اپیلیٹ ٹریبونل میں بانی پی ٹی آٸی کے حلقہ این اے 122 سے کاغذات نامزدگی مسترد ہونے کے خلاف اپیل پر سماعت ہوئی۔

جسٹس طارق ندیم بطور اپیلیٹ ٹریبونل نے بانی پی ٹی آٸی کی اپیل پر سماعت کی، ریٹرننگ افسر نے بیان دیا کہ دو وجوہات کی بنا پر کاغذات نامزدگی مسترد ہوٸے ایک توشہ خانہ میں سزا اور نااہلی اور دوسرا تجویز کنندہ اس حلقہ کا ووٹر نہیں ۔

بانی پی ٹی آٸی کے وکیل عزیر بھنڈاری نے کہا کہ توشہ خانہ میں سزا کا کوٸی قانونی جواز نہیں ، یہ سزا تحاٸف ظاہر نہ کرنے پر دی گٸی کسی جرم کی وجہ سے نہیں یہ ایک تکنیکی معاملہ ہے ۔

وکیل کا کہنا تھا کہ اگر کوٸی پٹواری کسی کو سزا دے دے تو یہ اسی طرح تصور ہو گی، سپریم کورٹ نے حکم دیا کہ تیس نومبر کے بعد حلقہ بندیوں میں کوٸی تبدیلی نہیں کی جاٸے گی ، الیکشن کمیشن نے شیڈول جاری ہونے کے بعد حلقہ بندی میں تبدیلی کی، شماریاتی کوڈ کےمطابق تجویز کنندہ اسی حلقہ کا ووٹر ہے۔

عدالت نے ریمارکس دیے کہ ایک سزا ہوٸی اور وہ ان فیلڈ ہے اس کا کیا بنے گا ، جس پر الیکشن کمیشن کے وکیل نے دلاٸل دیے کہ حلقہ بندیوں کے حوالے سے سپریم کورٹ کا حکم دو حلقوں کے متعلق تھا اس فیصلے کا اثر اس کیس پر نہیں پڑتا۔

انہوں نے کہا کہ سزا معطل ہوٸی ہے بریت نہیں ہوٸی، جس کے بعد عدالت نے فریقین کے وکلا کے تحریری دلاٸل جمع کروانے پر فیصلہ محفوظ کر لیا اور قرار دیا کہ فیصلہ کل سنایا جائے۔